Tlabung-a damdawi In sak thar Minister in a hawng

Health & Family Welfare Minister Lalrinpuii chuan cheng nuai 601.34 senga sak Sub-District Hospital Tlabung building thar chu nimin khan a hawng.

NABARD RIDF sum cheng nuai 601.34 senga sak Sub-District Hospital Tlabung building thar hawnna hunah hian Health Minister Lalrinpuii chuan Tlabung chu khaw hlun leh hmun pawimawh hmasa, tun thlenga heritage building engemaw zat la awmna a nih thu sawiin, kil hrang hranga a pawimawhna chuan hriat leh ngaih pawimawh a hlawh tir phah deuh deuh a beisei thu a sawi a. Hriselna kawnga hmalakna hrang hrangah pawh tan la thar deuh deuh va, hmasawn zel tum turin thawktute leh mipuite a chah a. Tlabung Sub-District Hospital chu hmanraw tha zawk leh thawktu tam zawk nena thuam changtlun a nih chuan hmunpui pan ngai thin tam tak chu enkawl theih an nih tawh dawn avangin mipuite'n an chhawr tangkai lehzual thei dawn niin a sawi bawk.

Health Minister Lalrinpuii chuan Mizoram-a Doctor indaihlohna zualpui phuhruk nan MBBS 20 leh BDS 5 lakna tur thil pawimawh te hmanhmawh taka buaipui mek a nih thu sawiin, mipuite'n an chhawr tangkai zawk theihna tura District Hospital, Sub-District Hospital, CHC, PHC leh Medical College te tihchangtlun chhoh zel tum a nih thu a sawi a. Damna duha damdawi In pan thin damlote chu taksa damna tluantling an pe thei lo a nih pawhin rilru damna pek tuma theihtawp chhuah thin tur te, damlo leh anmahni awmpuitute lo chhawn danah a tul anga inenfiah a, hmasawnna kawng zawh tum zel turin thawktute chu a chah bawk a ni.

Sub-District Hospital Tlabung hi khum 30 awmna niin, a sak thatna tur hian NABARD RIDF XXIX 2023–2024 hnuaiah a zavaiin cheng nuai 601.34 ruahman a ni a. He damdawi In sak that hna hi Zothan Consultancy Services te'n thawkin, January ni 20, 2025 atanga hna tanin, February ni 3, 2026-ah an zo a. A chhuat awh zau zawng hi square metre 824.73 niin, chhawng hniha sak a ni a. A chhawng khatnaah hian General Ward, Nursing Station, X-Ray, Operation Theatre, Ultrasound leh Endoscopy bakah Laboratory leh nau neihna pindan te awmin, a chhawng hnihna ah hian damlo awmna General Ward bakah, Nursing Station leh inthiarna hmun te dah a ni bawk.

Nimin-a Sub-District Hospital Tlabung building thar hawnna hun hi Health & Family Welfare Commissioner & Secretary K. Lalrinzuali chuan kaihruaiin West Tuipui Bialtu MLA Prova Chakma chuan Tlabung damdawi In sak thar leh tihchangtlun a ni chu lawmawm a tih thu sawiin, tha zawka thuam changtlun zel a nih a beisei thu a sawi a. Power & Electricity Department Chief Engineer Er. Laltlanthanga leh Tlabung Sub-Divisional Officer (Civil) Moses Lalfakawma Tlau te pawhin thu an sawi bawk a ni.