YMA leh Fisheries thawkdun

Mizoram sawrkar-a Fisheries Department leh Central YMA te chuan Luidung Humhalh tura thawhhona thuthlung nimin khan an ziak a, tun tum thu thuthlung an ziah tum thumna a ni.

Fisheries Department leh Central YMA te thawh-dunna thuthlung hi Fisheries Minister Lalthansanga Pisa-ah ziah niin Fisheries Department aiawhin Director Zonuntluangi chuan a hming a ziak a, Central YMA aiawhin President R. Lalngheta chuan a hming a ziak bawk a. Fisheries Department leh Central YMA hian kum 2021 atang khan Thawhhona Thuthlung hi kum 2 atan zel an lo ziak tawh thin a, tunah hian a tum 3 na atan thawhhona thuthlung hi an ziak leh a ni.

He thawhhona hian Mizoram luidung nungcha venhim leh humhalh kawngah nasa takin rah tha a chhuah zel a, tunah hian YMA Branch 93 zetin luidung humhalh bik an nei a. He an hmalakna avang hian Mizoram Luidung-ah Sangha an pun phah mek zel a. Chu bakah luidung humhalh inzirtirna kawngah te, luidung venhim leh dan phal loh hmanrua hmanga Sangha man chingte manchhuah kawngah Fisheries Department ten chak zawkin hma an lak theih phah tih sawrkar chuan an sawi a ni.

Nimin-a thawhhona thuthlung ziahna hunah hian Fisheries Minister Lalthansanga chuan Fisheries Department tan luidung zawng zawng vil a harsat thu sawiin, “Kan rama Tlawmngai pawl lian ber YMA ten kan luidung humhalh nachang hria a, Branch ten theihtawp a mahni huamchhung ah hma an lo la thin hi a lawmawm hle a ni,” a ti. Lungrual taka Fisheries Department leh YMA te thawhhona hian rah tha a lo chhuah tawh thin tih sawiin,  kum 2 an thawhho lehna turah hian Fisheries Acts leh Rules hnuaiah awmze nei leh tangkai zawka Mizoram luidung hausakna hman kawngah hma an sawn phah ngei a beisei thu a sawi bawk.