HSLC leh HSSLC result-a Merit List, Subject Topper, Letter hmuh zat leh Division tarlan loh pawi ti

Mizoram-a Private School neitu intelkhawm pawl, Mizoram Independent Schools Association (MISA) chuan MBSE-in kumin HSLC Ieh HSSLC result a tihchhuah danah Merit List, Subject Topper, Letter hmuh zat leh Division a tilang ta lo chuan zirlai naupangte a tihnual nia sawiin, pawi an tih thu an sawi.

Nimin-a Aizawl Press Club-a thuthar thehdarhtute an kawmna ah Mizoram Independent Schools Association (MISA) President alnunkunga Sailo chuan Mizoram Board of School Education (MBSE)-in kumin-a HSLC Ieh HSSLC result a tihchhuah dan chuan Mizoram mipui a barakhaih hle tih sawiin, zirlaite tana rualelna -Competition tha tak a nuai bo tur chu pawi an ti takzet tih a sawi a. Hei hian mimal-a result nei tha leh School result nei tha te tarlan lo ni thin chu thai bovin, ang khat vekin a hrut rual a. Deficit School, Private School leh Sawrkar School ngawrh leh taima taka zirna kalpui thin te chu inthlahdah taka zirna kalpuitute nen ang khat veka a hrut rual ta mai chu standard tlakhniamna nasa takah an ngai tih a sawi a. “Inelna sang tak hmanga zirna quality sang tak kan lo neih thin chu inelna awm lovin a tlusawp dawn ta kan ti lo thei lovang,” a ti a ni.

MISA President chuan zirna hi thangkhat lian zet chu CCE Pattern-in pawl hniam lamah kalpui a lo ni tawh tih sawiin, “Hei hian kan Elementary Education a sawpchhe hneh hle a, a hrechiang leh a chik nu leh pa te chu an rum vawng vawng a ni ber e,” a ti a. Hei hi a chhan chu CCE hian ‘No Detention’ a ken tel vang a nih thu sawiin, “Mizo naupangin pawl 1 atanga pawl 8 thlengin a fail theih loh tih hian an rilru a ti hniamin, an thahnem ngaihna, taihmakna leh tih hram hramna awm thin kha a nuai bo ta daih hi thil pawi tak a ni. Hetiang anih tawh nak a laia HSLC leh HSSLC-a Competition awm thin paih bova a hniam zawnga tlan a result chipchiar lo taka chhuah hian Zofate zima nasa takin a pawt hniam dawn tih a chiang em em a ni,” a ti bawk.

MBSE leh School Education Minister ten result tihchhuah dan an tihdanglam chhanah By-heart System nuai bo an duh vang te, Zirlai exam turte rilru hah lova exam tir an duh vang te leh ICSE leh CBSE te pawhin result an tihchhuah in Merit List an tichhuak ngai lo tih an tanchhan chuan awmze ril a nei lo hle niin a sawi a. Mizo naupangte sukthlek enin result puan dan thar chuan naupang tam takah inthlahdahna leh rual el tawk lohna a thlen thei dawn a. Zirlai naupang thiam thei tak tak leh tum sang tak neite a tihnual ngei dawn nia a lan avangin pawi an ti hle tih a sawi a ni.