VC te Computer semin Lawngtlai-ah DPRC hawn a ni

Rural Development & Administration Department changtu Minister Prof. Lalnilawma chuan nimin khan Siaha leh Lawngtlai tlawhin VC te hnenah Computer a sem a, Lawngtlai-ah District Panchayat Resource Centre (DPRC) a hawng nghal bawk.

Nimin zing a Siaha MADC Golden Jubilee Hall-a Computer semna hunah hian Rural Development & Administration Department Minister Prof. Lalnilawma chuan langtlang leh tangkai taka hman a nih theih nana a hmun ngeia kalchilha Computer te chu sem a nih thu sawiin, “Sawrkar in online connectivity a ngai pawimawh hle a, Vawiin-a Computer semchhuah te chu a tangkaina hmang chhuak thei turin inthuamchak a ngai a, khawvel hmasawnna umpha zel tura mahni thiamna tahhriam zel a ngai,” a ti bawk.

He hunah hian Siaha District chhunga Village Council 7 te hnenah Rashtriya Gram Swaraj Abhiyan (RGSA) kaltlangin Computer Set hi sem a ni a, RGSA hi Centrally Sponsored Scheme (CSS) niin Ministry of Panchayati Raj, Govt. of India hnuaia mi a ni a, ram pum huap khawtlang inrelbawlna tihchakna tura hmalakna a ni.

RD Minister Prof. Lalnilawma hian nimin vek khan Lawngtlai-ah District Panchayat Resource Centre a hawng bawk a, District Panchayat Resource Centre hi Rashtriya Gram Swaraj Abhiyan (RGSA) hnuaia sak niin, Office Building leh Hostel Building sak nan hian cheng nuai 100 ve ve rua-hman a ni a, Office Building-ah hian Conference Room, Office Room leh Meeting Room pakhat theuh awmin Hostel Building-ah hian Bedroom 7 awmin Khum 2 theuh a awm a, Choka/Chawkidar quarters-a awm bawk a ni. He Building hi Biakliana & Sons, Sikulpuikawn, Aizawl te sak a ni a, nimin-a a hawnna hunah hian Lawngtlai District-a VC 15 te hnenah Computer Set hlan nghal a ni bawk.