Mizoram Police Year of Discipline hawnna neih a ni

Zonuna Kawlni /

Mizoram Police ten tha tak leh khauh lehzual-a an hna an thawh theihna tur atana duan, 'Year of Discipline' chu nimin khan Home Minister K. Sapdanga hovin a hawnna neih a ni.

Mizoram Police in ‘Year of Discipline’ atana kum 2026–2027 an puan hawnna hun Aizawl Khatla-a Mizoram Police Hqrs. G.S. Arya Mess-a neih ah hian Home Minister K. Sapdanga chuan Discipline chu Police-te tan chuan an neih makmawh a nih thu sawiin, Mizoram ralmuanna chu ngaia nei a, inthlahdah mai lo tur leh remna a awm zel theih nana tan lak zel a tul thu a sawi a. Police-te chu an tawngkamah te, an chezia ah te leh an nungchangah te inthunun ha tura fuihin, Mipuite rinngama Police-te an awm phawt chuan mipuite pawhin Dan zawm an ngaih pawimawh ngei a rin thu a sawi bawk. He hunah hian Home Minister chuan he hmalakna atana inkaihhruaina leh hmachhawp pawimawh tak tak awmna lehkhabu, ‘Mizoram Police Model Guidelines for Year of Discipline 2026–2027 (Core Principles and Specific Areas of Focus)’ chu a tlangzarh nghal a ni.

Nimin-a he hun hman ah hian IGP, DIG, AIG, SP leh Commandant zawng zawng te, Police Training School-a Principal leh Aizawl-a Police Officer hrang hrangte bakah Home Department-a Official lian leh sawm bik mi thahnem tak an tel a. Mizoram DGP Sharad Agarwal pawhin Discipline chu Police Service zung pawimawh a nih thu sawiin, Rinawmna leh inpekna nena hna thawk theuh turin Police-te chu a fuih a ni.

'Year of Discipline' lungphum leh thlur bik turte :

- Hun vawn dik, mahni hnaa rinawm, leh thahnemngai taka mawhphurhna hlenchhuah

- Hnathawh dan kalphung inkaihhruaina vawn dik, document vawn dik, dan zawm that leh thubuai chhui (investigation) a hun taka tihfel.

- Hna chungchanga nungchang mawi vawn, mipui nena indawrna ah inthliar hranna awm lova rualkhai taka chet, mi harsa leh chak lo zawkte hriatthiamna neih.

- ‘Train to Excel’ programme hnuaia taksa hriselna leh engtik lai pawha che chhuak thei tura inbuatsaih.

- Turnout fel tak nena Parade, Drill leh endikna (inspection) neih thin.

- Police hmunhma hrang hrang (establishment) te fai taka vawn leh enkawl.

- Sawrkar bungrua te uluk taka enkawl leh chumi chungchanga mawhphurhna lak.

- Rinawm, dik leh langtlang taka hna thawh.

- Hotuten an hnuaia mite hnathawh vil that.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Lirthei chesual-ah boral

Zonuna Kawlni /
Image
Serchhip District chhung Bungtlang Chhim Veng-a cheng K Lalruatfela chu Zirtawpni zan (April 24, 206) khan Scooter-a chesualin a boral a, Inrinni khan vuiliam a ni. Thudawn danin kum 18-a upa K. Lalruatfela S/o K. Laltlanthanga hi Zirtawpni zan khan an leng tur Scooter-a a chhuak chuan a hmaa LPK Truck ding chu a su palh a, na taka hliam tuarin Serchhip damdawi In rawn panpui a ni a, amaherawh chu a hliam tuar lovin Zirtawpni zan dar 7:25 vel khan a boral zui ta a ni. A ruang hi Bungtlang-ah lak niin lumen a nih hnuah Inrinni khan vuiliam a ni.
Kimchang zawkin »

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »