MIFCO in product tlangzarh

Mizoram Food & Allied Industries Corporation Limited (MIFCO) chuan Lakhuihthei leh Sapthei tui in nghal mai theih tura an siam, Ready To Serve (RTS) beverages chu niminpiah tlai khan Chhingchhip-a an hmunpui-ah an tlangzarh.
Hemi puala hun buatsaih ah hian Mizoram sawrkar-a Finance Secretary Ramchuana chuan Lakhuihthei leh Sapthei Ready To Serve (RTS) beverages hi tlangzarhin 13th Finance Commission-ah khan sum a harsat thu leh PSU zingah MIFCO pawh hi Private kuta hlan rel a ni tih sawiin, “Sawrkar tharin hmalakna te chhawpin mumal deuha kalin product pahnih tlangzarh theiin kan awm leh ta a ni,” tiin hmalâk tum tak tak te tanpuina inpêk chu an inhuam em em tih a sawi a. MIFO thang chho zel chu lawmawm a tih thu leh MIFCO leh ZOHANDCO chu mahni siamchhuah atanga ding chhuak thei an nih thu a sawi a. “Mahni tharchhuah nei tur in ni a, in tanlakna te a takin kan hmu a, a lawmawm ka ti. Tunhma aia hmasawn turin duhsakna ka hlan a che u,” a ti bawk.

RTS tlangzarh inkhawm hi MIFCO Ltd. Managing Director Lalnunvela chuan kaihruaiin tun tuma tlangzarh tak theitui chi hnih - Sapthei leh Lakhuihthei tui in nghal theih hi bur khat Rs. 10 man zêla zawrhchhuah tur a ni. MIFCO hian Sapthei hi kg khat cheng 45-in an la a. Chhingchhip-ah hian Ropuiliani Women Farmer Producer Company Limited awm bawkin anni hian Hmarcha an sawngbawla hmarcha ro thahnem tak an hralh chhuak thin a ni.

MIFCO hian hmun thum-ah hmunhman neiin Sairang-a an hmun chu Rel a lo thlen tâk avangin 'Warehouse Complex' atan siam an tum mek a. Bungbangla hmuna ran talhna hmun chu 'Outsource' tawhin Zo Meat kutah dah a ni a, anni hian Vawksa thianghlim an zuar a, Electric bill an tum bakah fee an chhunglut bawk a. Chhingchhip a an hmun ah hian processing Unit pahnih an buatsaih leh dawn a, Buhfai an supply bakah Petrol Pump siam turin hma an la mek a ni.