Nikum-ah Mizoram CWC in case 1321 leh JJB in case 261 an chingfel

Zonuna Kawlni /

Sawrkar kum kalta nikum April 2025 atanga kumin March 2026 inkar chhung khan Mizoram sawrkarin naupang leh tleirawlte harsatna chingfel tura a ruat, Child Welfare Committee (CWC) chuan case 1321 leh Juvenile Justice Board (JJB) in case 261 an chingfel.

Mizoram State Child Protection Society (MSCPS) thawktute sawi danin sawrkar kum liamta chhung khan naupang chungchang ngaihtuah tura ruat Child Welfare Committee (CWC) hian kum hmasaa case ngaihtuah hman loh (pending case) 78 neiin case dawn thar 1299 an nei bawk a. Heng zinga case 1321 chu chingfelin case 56 chu kum thar lam ngaihtuah chhunzawm turin an dah a ni. Child Welfare Committee (CWC) in case an dawn thar zingah hian retheihna avanga naupang enkawl thei lo chu tam berin case 444 a tling a, hei hi case an dawn zawng zawng atanga chhutin 34% a tling a. Nu leh pa fel lo/enkawl mumal thei lo (incapacitated parents) chu case tam ber dawttu niin case 253 ngaihtuah a ni a, mipat hmeichhiatna rawngkai (sexual abuse) chu pathumna niin case 180 dawn a ni bawk. CWC case dawn thar zinga 671 chu hmeichhia niin mipa 628 an awm bawk a. Child Welfare Committee in case an chinfel zinga tam zual chu midang enkawl tura kal tir (sponsorship) niin 609 a awm a, Children Home a dah 351, Councelling kal tir 221, Case tih tawp 46 leh chhungte hnena haw tir leh 47 te an awm bawk a ni.

Nikum (April 2025-March 2026) chhung vek hian kum tling lo tleirawl/rawl-thar te harsatna ngaihtuah tura din Juvenile Justice Board (JJB) chuan case 261 an chingfel bawk a. JJB hian kum hmasa lama case pending 86 neiin dawn thar 273 an nei bawk a, case 98 chu kumthar lama ngaihtuah chhunzawm tura dah a ni a, JJB case dawn thar zinga 22 hi hmeichhia niin mipa 251 an awm bawk.

Nikum chhunga Juvenile Justice Board (JJB) case dawn thar zingah hian rukruk kaih-hnawih thubuai tam berin case an dawn thar zawng zawng 273 zinga 145 lai rukruk case a ni a, hei hi case an dawn thar atanga chhutin 53.11% lai a tling a. JJB case dawn thar zingah hian POCSO Act bawhchhiatna 45, ND&PS Act 25, mi tihnat 10, IPC bawhchhiatna 15, mi In-a luh ruk/in rawk 6 leh midang va beih (assault) case 5 te an ni a. JJB case chinfel zinga tam zualte chu In lama haw tir leh 125, nungchang that vanga chhuah 57, Special Home-a dah 32, Pawisa chawitir 14 leh pawikhawihna nei loa hriat 12 te an ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Lirthei chesual-ah boral

Zonuna Kawlni /
Image
Serchhip District chhung Bungtlang Chhim Veng-a cheng K Lalruatfela chu Zirtawpni zan (April 24, 206) khan Scooter-a chesualin a boral a, Inrinni khan vuiliam a ni. Thudawn danin kum 18-a upa K. Lalruatfela S/o K. Laltlanthanga hi Zirtawpni zan khan an leng tur Scooter-a a chhuak chuan a hmaa LPK Truck ding chu a su palh a, na taka hliam tuarin Serchhip damdawi In rawn panpui a ni a, amaherawh chu a hliam tuar lovin Zirtawpni zan dar 7:25 vel khan a boral zui ta a ni. A ruang hi Bungtlang-ah lak niin lumen a nih hnuah Inrinni khan vuiliam a ni.
Kimchang zawkin »

Serchhip Fire Station-a thawk in chawimawina dawng

Zonuna Kawlni /
Image
Kumtin April 14 atanga 20 chhunga India ram a ‘Fire Service Week’ hman thin denchhenin kumin hian Mizoram-a Fire & Emergency Services-a thawk mi panga (5) te chu an hnathawh that avangin sawrkar laipui Ministry of Home Affairs-a Director General-Fire Service, Civil Defence & Home Guard chuan ‘Silver & Bronze Disc and Commendation Certificate’ dawng tura thlangin an zinga mi pahnih te chu Serchhip Fire Station-a thawk an ni a. Serchhip Fire Station atanga Brone Disc dawng tura thlan hi Firefighter R.Laltanliana leh Driver Grade-II FX Laltanpuia te an ni a. Anni bakah hian Brone Disc dawng tura thlan hi Mamit Fire Station atangin mi pahnih leh Silver Disc dawng tura thlan Lalremmawia, Divisional Fire Officer, F&ES te an tel bawk a ni. 
Kimchang zawkin »