Neihloh khua sawn tura hmalak dan tur District Bawrhsap hovin sawiho a ni
Niminpiah khan Neihloh khaw sawn chungchang hi Chief Minister Lalduhoma hovin CM Conference Hall-ah sawihona neih ni tawhin hemi bawhzuina atan hian he thutkhawm hi Serchhip DC Meeting Hall-ah neih niin hmalak zui dan tur ruamhmanna ‘Standard Operating Procedure’ chu thlirho a ni a. He thutkhawm ah hian Bawrhsap Paul L. Khuma chuan Neihloh khua chu Mizoram Remote Sensing Application Centre (MIRSAC) leh Geologist-te zirchianna atanga a lan danin, mihring chenna atana him tawk lo, chhiatrupna thlen theihna hmun a nih thu a sawi a. Geo-Technical Survey Report-a a lan danin, Neihloh khaw hmar lam meter 200 bial chu leimin thut thut awm fo theihna hmun a nih thu leh chhungkaw za zela sawmruk (60%) bawr velte awmna chu lei tawlh hlauhthawnawm ‘Very High Zone’ ah an awm tih a sawi a. Hetiang a nih avang hian Sawrkar leh Neihloh khawtlang hruaitute chuan tuna khaw luahlai atanga hla lutuk lo leh hmun him chin, Km 3 bawr vela hlaah insawnchhuahna turin hma an lak mek thu a sawi a. Mipuite nena thawhhona a pawimawh thu sawiin, Neihloh khawtlang hruaitute chu khaw mipuite zawldawh taka dawr thin tur te, dik leh langtlang taka hna thawk turte leh Mizoram tana khaw entawntlak nih tum turtea chahin duhsakna a hlan a ni.
He thutkhawmah hian Sub-Deputy Commissioner (SDC) Vanthangpuia chuan Neihloh khaw sawnna tur atana hmalak dan tur ruahmanna ‘Standard Operating Procedure’ (SOP) tlangpui a sawi a, hemi hnu hian sawihona neih niin hmalak zel dan tur - Committee hrang hrangte leh an hna chanpual theuh tur te, In sak dan tur leh infrastructure hrang hrang din dan turte leh chak taka hna thawh a nih theih dan turte sawiho a ni.
Neihloh-ah hian tunah dinhmunah chhungkaw 77 awmin, mi 413 an awm mek a, khaw thar kaina tura In sak thar tura ruahman 92-te chu pawm tawh niin chenna In pakhat sakna atan sawrkarin cheng nuai 15 zel a pe dawn a. Sum leh pai hman belh tur neite’n lian zawk leh tha zawkin an chenna tur In hi an sa thei bawk ang. In sak dan tur hi a hniam lam (minimum standard) bituk sak vek a ni thung a. Sum hi Direct Benefit Transfer-in a dawngtu turte Bank Account-ah Installment li (4)-in pek tura ruahman a ni.
He thutkhawm ah hian Neihloh khaw sawnna tura ruahmanna ‘Master Plan’ duangtu, Town & Country Planning, UD&PA pawh online kaltlangin an tel ve bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!