Larsap in lehlanga Serchhip District rawn tlawhin Serchhip leh Chhingchhip-ah hun a hmang
Mizoram Larsap hian nimin khan Aizawl atanga Serchhip District hi rawn tlawhin Serchhip a rawn panna ah Chhingchhip-a Sainik School chu tlawhin Brig. Puspendar Sorayan, DIG 23 Sector Assam Rifles leh Vice Principal Lt. Col. Kartik Sood, AEC ten an lo hmuak a. Zirtirtu, Staff leh Zirlaite fuihna thu sawiin, Sainik School Chhingchhip atanga zirchhuak zirlai pahnih ten National Defence Academy (NDA) a lut thei tura Exam an paltlang chu lawmawm a tih thu a sawi bakah an kalzelna turah duhsakna a hlan a. Tunhnaiah Sainik School-in hmasawnna hrang hrang a hmu chu lawmawm a tih thu sawiin, Principal, Zirtirtu leh Staff-te chu theihtawp chhuah chhunzawm zel turin a chah a ni.
Larsap General (Dr) Vijay Kumar Singh chuan Sainik School chu mi tha leh danglam bik chherchhuahna tur hmun a nih thu sawiin, Armed Force-ah lut vek lo mahse, an kalna zawn theuhah chhawr tlak leh danglamna thlentu nih tum turin a fuih a. Ram in thalai nakin lawka hruaitu tha ni tur a mamawh tih sawiin, Zirlaite chu danglam bik nih tum tur leh sang tak thlen tum turte, inthununna tha nei tur leh hlawhtlinna chang thei tura inpekna nunpui tlat turte, khawtlang leh ram tana chhawrnahawm tak nih tum turte in a chah a ni.
Hemi hnu hian Larsap hian Serchhip rawn pan lehin 14 Assam Rifles Headquarter a tlawh a, hetah hian Commandant, Col. Archit Goswami, SM chuan an hmalak dan hrilhfiahin Ex-Servicemen Member, Govt. Serchhip College zirlai leh Sipaite a kawm a. Zirlaite chu ruihhlo leh a kaihhnawih laka fihlim tum tur leh eng hna pawh thawk se rinawm leh taima taka thawk turin a chah bawk a ni.
Larsap hian New Serchhip-a Shalom Special School pawh tlawh nghalin Board Member leh zirlaite a kawm bakah ei leh in tur a kensak te a hlan a. BHe School Principal A. Lalawmpuii hnen atangin School chanchin leh enkawl dan tlangpui ngaihthlak a ni a. Larsap leh Assam Rifles ten kawng engkima an ngaihtuah thin avangin lawmthu a sawi a. Shalom Special School tana a thawh hlawk em avangin Larsap hi chawimawina thuziak cheimawi an hlan nghal a ni.
Shalom Special School, Serchhip hi August ni 17, 2005 khan Chief Minister hlui Lal Thanhawla hova din a ni a, tuna an School building ni ta sakna tur lungphum hi Mizoram Larsap hian Eastern Army Commander a nih lai, January 2010 khan a lo phum tawh a, Serchhip-a awm thin 4th Assam Rifles te'n Military Civic Action kaltlangin a building hi an sak sak bawk a ni. Tun dinhmun ah Shalom Special School, Serchhip-ah hian Vohbik zirlai 36 an awm mek a ni.
Heng hmun hrang hrang a tlawh hnu hian Larsap hian nimin chawhnu lam khan Aizawl a pan leh nghal a ni.
Comments
Post a Comment
I ngaihdan i sawi hian mipui ngaihdan i tarlang a ni!