Sawrkar kum liamta ah khualzin 9,80,618 rawn lut

Sawrkar kum liamta 2025-26 chhung khan Mizoram-ah khualzin mi 9,80,618 chhinchhiah an ni a; heng zinga mi 9,66,060 chu India mi niin, rampawn mi (foreigner) 14,558 an awm a, hriat theih chinah kum 17 chhunga Mizoram a khualzin rawn lut an tam ber kum a ni.

Tourism Department-in India rama State dang mite leh rampawn atanga Mizorama rawn lut zat a chhinchhiah dan chuan, sawrkar kum liamta April ni 1, 2025 atanga kumin March ni 31 thleng khan Mizoram lukha hrang hrang atangin khualzin mi 9,80,618 an rawn lut a; kum 2009-10 atanga chhiarin kum 17 chhunga Mizoram-a khualzin an rawn luh tam ber kum a ni a. Kum liamta dawta khualzin rawn luh tam ber kum chu kum 2024-25 kha niin khami kum khan khualzin mi 5,24,784 an awm a ni.

Kum liamta chhunga Mizoram-a khualzin rawn lut zinga mi 14,558 hi foreigner an ni a, foreigner zingah hian Myanmar mi 10,956 awmin an tam ber a, Foreign Tourist chhinchhiah zat atangin za zela 75.26 an tling a. Myanmar mite dawtah hian USA atanga rawn lut tamin, mi 878 an ni a, Foreign Tourist chhinchhiah zat atangin zaa 6.03 an ni.

Tourism Department hian kum 2023-24 atangin Foreign Tourist bik hi an ram mal angin a tarlang a; kum 2023-24 khan Foreign Tourist 3,884 awmin heng zinga 1,336 hi USA atanga rawn lut niin an tam ber a, Australia atanga rawn lut mi 298 ten an dawt a. Kum 2024-25 khan Foreign Tourist 5,911 chhinchhiah niin, Myanmar atanga rawn lut mi 1,472 leh USA atanga rawn lut 1,222-te chu a tam zual an ni a. Kum 2023-24 data atanga a lan danin nikum 2025-26 thleng khan Mizoram-a Foreigner rawn zinte zingah hian Myanmar, USA, Australia, UK, Japan leh Israel mite an tam zual a ni.