Kan thalai tam tak ten NCC zarah nun kawng dik an zawh - Chief Minister

Chief Minister Lalduhoma chuan kan ramah ruihhlo a hluar avangin kan thalai tam takte nun a chhe mek tih sawiin, kaihruaitu tha an mamawh thu a sawi a. “Kan thalai tam tak ten NCC zarah nun kawng dik an zawh a, ram tana mi hmantlak ni turin an inzir mek a ni,” a ti.

Chief Minister Lalduhoma hian nimin khan Lunglei Thuamluaia Mual-ah 2 Mizo Battalion NCC te bultuma ‘National Cadet Corp (NCC) Fest’ leh 2 BN MAP Ground-a ‘Parasailing Camp’ neih mek chu Khuallian nia hmanpuiin 2 Battalion NCC te hmalakna chu fakin, “Kan thalai tam tak ten NCC zarah nun kawng dik an zawh a, ram tana mi hmantlak ni turin an inzir mek a ni,” a ti a. Mizoram in NCC Group Headquarters thar kan nei tawh thu sawiin, “Phur takin hma an la, hna a thawk nasa a. Hun reilote chhungin an hmasawnna kan hmu nasa tawh hle. NCC a inhmang kan naupang tam takte hi sipai-ah te, Police-ah te, Territorial Army-ah te an lut tawh a ni,” a ti a. Nu leh pa te pawh NCC hmalakna hi thlawp tura sawmin, “Kan ramah ruihhlo a hluar avangin kan thalai tam takte nun a chhe mek a. Kaihruaitu tha an mamawh a. NCC hian thalaite kaihhruaina lamah tawnhriat an nei tha a, an thiam a, naupangte chu mahni inthunun thei, taima, tawrhchhel leh mi tumruh takah an chhuah thin. Sipai-ah kal zui kher lo mah se an eizawnna kawngah an tangkaipuizui thin a ni,” a ti a. He hun hmang tura thenawm State atanga lo kal NCC Cadets te chungah lawmthu sawiin, NCC chu hnam hrang hrangte inunauna tha zawk neihna hmun tha a nih thu a sawi bawk a ni.

Lunglei Thuamluaia Mual-a neih National Cadet Corp (NCC) Fest hi Mizoram-a NCC Fest hmasa ber niin tun thla ni 5 atang khan neih niin karleh Thawhtanni khian zawhfel tura ruahman a ni a, he Fest-ah hian NCC lawmman hrang hrang sem a ni a, Hnam lam entir a nih bakah dawr (stall) engemaw zat hawn a ni bawk.

NCC Fest a telpui zawh hian Chief Minister hian Lunglei District Hospital-a Lunglei Health ATM chu tlawhin Electric Veng-a Leitlangpui H/S-a Astronomy Lab chu a tlawh leh bawk. Health ATM leh Astronomy Lab te hi Lunglei DC Navneet Mann hmalaknaa CSR sum atanga din a ni a. Chief Minister hi Minister leh MLA thenkhat bakah sawrkar Official ten an tawiawm a ni.