Inhawhfa thin leh a chhawrtu tur (employer) indawrtawnna tur mobile app tlangzarh a ni
LESDE Auditorium-a ‘Mizoram Labour Link’ Mobile App tlangzarhna hunah hian LESDE Minister Lalnghinglova Hmar chuan khawvel thiamna thangzel banpha tur leh tel ve thei tura Mizoram mipuite tana tangkai tur Mizoram Labour Link Mobile App a tlangzarh thei chu lawmawm a tih thu sawiin, tunlai khawvel intlansiakna ber, hmasawna min thlentheitu tangkai tak ni bawk chu Digital Infrastructure hi a nih thu a sawi a, “Mihring thiamna tihpunna chu Digital World-ah a awm a ni,” a ti a. Mobile App tlangzarhna ah Press mite leh MJA hruaitute an tel thei lawmawm a tih thu sawiin, he app an tlangzarh chhan, a hmangtu tur tak ten an hman tangkai theihna turin a thehdarhna kawngah Press mite hma la turin a sawm a. Hnathawktu hnufual zawkte leh hmun kilkhawra awmten an hriat a, an hman tangkai theih nana Awareness Campaign neih turin a chah bawk a ni.
Mizoram Labour Link Mobile Application hi ni tin inhawhfa thin (Daily Labourer/Workers) te leh a chhawrtu tur (Employer) indawr tawnna tur (Digital Platform) atana duan niin Pawnlam mi (middlemen) inrawlhna tih tlem te, Hnathawh tur zawnga hmun him lo laia Workers/Labours-te fuankhawmna tih bo leh Ni tin inhlawh thinten an thawh hlawh dik tak (fair wages) langtlang taka an hmuh theih te chu a tum a ni a. He platform hi Mobile Application chauh ni lovin, Mizoram-a nitin inhawhfa thinte leh a chhawrtute indawrtawnna awlsam zawk leh technology-Driven Labour Ecosystem dinna tur lungphum a ni a. He application hi tihchangtlun chhoh zel tura ruahman a ni.
He Link hi ni tina inhlawhfa thinten hna an zawn/hmuh theihna tur leh hamthatna an dawn theih angte an hriat theihna tura duan niin hmun kilkhawr ber bera awmte tan pawha awlsam taka an hman tangkai theih tura duan a ni a. He platform hi employer-te leh hnathawh tur zawngte inkara inzawmna tha zawk siam tumna a nih bakah Mizoram sawrkarin digital governance a tihchangtlun lehzualna tur atana hmalakna a ni a. He App-ah hian Hna zawnglai (worker) leh a chhawr theitu tur (employer) inziahluh theihna awmin Hna tarchhuah (job posting) theihna leh dil theihna tel; SMS leh Push Notification hmanga inhriattir theihna te; Hna zawngtu leh hnathawh tur neitu inbiakpawh theihna te; Awmna hmuna zir (location based) leh thiamthil bik (skill based) a zira hna zawnna leh tarlanna bakah Mobile application hmangtu account nemnghehna leh venhimna te a awm bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!