Union MoS for PNG & Tourism in Kolasib District a tlawh

Union Minister of State for Petroleum & Natural Gas and Tourism Suresh Gopi chuan nimin khan Kolasib tlawhin District chhunga sawrkar Department hrang hranga hotute a kawm.

He inkawmna ah hian Kolasib District chanchin leh an dinhmun tlangpuite tarlan niin Union Minister Suresh Gopi chuan Kolasib mipuite leh sawrkar hotute a hmu thei chu lawmawm a tih thu a sawi a. Ram hmasawnna tura chhiarpui (Census) neih pawimawh zia sawiin, Chhiarpui chu mipuite dinhmun leh nihna dik tak hriatchianna a nih avangin, ram hmasawnna tura sawrkar ruahmanna (planning) siam nan a pawimawh em em ti a sawi a. Mizoram in inkal-pawhna (connectivity) tha zawk, a bikin Rel kawng tha tak a nei chho mek chu lawmawm a tih thu sawiin, Kawlphetha (power) kan mamawh ang kan inphuhruk theih nan Hydro-Electric Project tam zawk neih theih dan ngaihtuah a pawimawh thu a tarlang bawk.

Zirna lam pawimawhna tarlangin Union Minister Suresh Gopi chuan Kendriya Vidyalaya (KV) neih a pawimawh zia sawiin, Mizoram pumah KV pakhat chauh a awm chu pawi a tih thu a sawi a, KV a tam zel theih nan MP te hnena thlen nise a ti a. Hmeichhiate zirna chuan ram hmasawnna ah kawngro a sut thui thu sawiin, Nursing lamah te pawh tam zawka an kal theih nana hmalak a pawimawh thu a sawi. Hei bakah hian Basic Fundamental Education leh School Education-in naupangte nuna kawngro a sut thui zia sawiin, quality leh standard a that phawt chuan naupang ten an thlen chin tur sang tak an thleng thei a ni, a ti.

Mizoram chu leilung tha tak leh thlai tha tak tak tharchhuah theihna a nih angin Horticulture leh Agriculture product te chu State pawn mai bakah rampawn thlenga thawnchhuah a nih theih nan theihtawp chhuaha hmalak a pawimawh thu  sawi a bawk. Kolasib DC Conference Hall-a hun an hman zawh hian Bukvannei-a Oil Palm Processing Mill chu a hmunah a tlawh nghal bawk a ni.