Huntiam chhunga Hnahthial Damdawi In sa zo turin hrilh

Health Minister Lalrinpuii chuan nimin khan khum 50 awmna tur Hnahthial District Hospital sak mek chu tlawhin Hospital sak hna thawktu, North East Consultancy Services (NECS) chu an huntiam, kumin December chhung ngei a sa zo hman turin a hrilh.

Health Minister hian nimin a Hnahthial a tlawhna ah hian District thuneitute leh Health Department-a thawktute kawmin Hospital-a thawktu indaihlohna chu a hriatpui thu sawiin, an indaihlohna te chu phuhruk turin theih-tawp a hma an lak mek thu a sawi a. He hunah hian khum 50 awm theihna tur District Hospital sak mek dinhmun tarlan niin, tun dinhmunah Hospital structure chu 70% vel zawhfel a nih tawh thu leh Type-III Quarters chu a vaiin 70% vel sak zawh a nih tawh thu an report a. Type-IV Quarters erawh chu hmanrua dahna tur tha a awm loh avangin duh anga hma an la lak theih loh thu an sawi a ni.

Inkawmna neih a nih hnu hian Minister hian District Hospital sak mek bakah building hrang hrang awmte chu a hmunah a endik nghal a. A sak hna thawktu NECS te chu rinawm leh hmantlak ngeia sa tura hrilhin, Hospital chu huntiam chhunga sa zo hman ngei turin a hrilh bawk a. Hei bakah hian hmanraw dahna tur awm loh avanga Type-IV Quarters sak chhunzawm theih loh chu a vei thu sawiin, Hospital hmunhma a enfiah hnuah hmun awl deuh lai chu an hmanraw dah nan lo hmang mai turin NECS te chu a hrilh nghal a ni.

Heng Building te hi North East Special Infrastructure Development Scheme (NESIDS) hnuaia sak niin estimate chu cheng vbc. 16 a ni a, North East Consultancy Services (NECS) te hian a sak hna hi August 2024 atang khan thawk tan in Dec. ni 25, 2026-a zo hman tura ruahman a ni a, thawktu mi 46 an awm mek a ni.