Pension tawh rawih nawnna sut leh turin phut

Mizo Zirlai Pawl (MZP) chuan Mizoram sawrkar chu tun thla, May ni 14 ralhma ngeiin sawrkar hnathawk pension tawh a rawih nawnna order sut turin an ngen.

    Nimin-a Aizawl Press Club-a thuthar thehdarhtute an kawmnaah MZP General Hqrs. President Dr. C. Lalremruata chuan Mizo Zirlai Pawl (MZP) General Headquarters Executive Committee vawi 652-na thukhawm chuan, Mizoram sawrkar hnuaia hnathawk pension tawh tunhnaia rawih nawn chungchang an ngaihtuah thu sawiin, tunhma atangin MZP chuan pensioner rawih nawn chu nasa taka dodalin, duh lohna a lo lantir tawh thin thu leh tuna pensioner chungchangah pawh hian MZP ngaihdan a la ngai reng tih a sawi a. MZP chuan sawrkar hnathawk ruai nawn lo tura thuneitute an ngen reng laia sawrkarin a ruai nawn chu Mizoram mipuite leh thalai hna zawng mekte zah lohna leh hmusitna ah an ngai tih sawiin, tuna Pension rawih nawnna order chu karleh Ningani, May ni 14, 2026 ralhma ngeia sut turin Mizoram sawrkar thuneitute an ngen tih a sawi a ni. MZP President chuan MZP chuan Sawrkar hnathawk pension rawih nawn fo thin chu tunhma atangin tha a tih loh thu a au chhuahpui bakah bang tura nawr pawh a lo nei tawh thin tih sawiin, chutiang thil thlen ngai lo tur chuan thuneitute pawh a tul anga hma la turin an ngen nawn leh tih a sawi a. Sawrkar hnathawkte chu an hnathawh hun chhunga thahnem ngai taka thawk tura ngenin, an pension hnuah erawh thalai hna zawng mekte kian turin an duh takzet tih a sawi a ni.