AIR kum 90-na pualin Aizawl ah Walkathon nei

All India Radio (AIR) kum 90 tlin lawmna pualin nimin zing khan AIR Aizawl chuan a huho a ke-a kal, Walkathon a huaihawt a, Tuikhuahtlang AIR Station atanga Millennium Centre thleng a huhoin AIR-a thawktute leh lo thawk tawh thin bakah mipui thahnem tak an kal a ni.

Walkathon vailiamtu AIR Aizawl Director leh Mizoram Cluster Head DR. Lalropuia chuan All India Radio ngaihlutu bakah AIR-a thawk mek leh thawk tawh thahnem tak an kalkhawm chu lawmawm a tih thu a sawi a. All India Radio lungphum, mipuite aw, mipuite lungphu an nihna chu India in zalenna a hmuh hma kum 11 daih tawh atangin lungphum chu a intan tawh tih a sawi bawk.

All India Radio kum 90 tlin lawmna pual hian AIR Aizawl chuan hun pawimawh hrang hrang buatsaihin a khuhhawn nan Lamp Lighting bakah 90 Years Musical Concert te a buatsaih a, Walkathon hi Aizawl mai nilo District dangah pawh buatsaih a ni. 

All India Radio hi June 8, 1936-ah din niin, New Delhi-ah Headquarters a awm a; AIR Aizawl hi India ram puma AIR Station 230 zinga pakhat niin, AIR kum 90 tlin pual hian AIR Aizawl chuan a lawmnapui ber hi June ni 8, 2026 khian Vanapa Hall-ahhman a ni ang.