Nu chhuanawm chawimawi
District Programme Officer (DPO), Women & Child Development (WCD) Department, Ser-chhip District chuan Mother’s Day denchhenin nimin khan Serchhip DC Office Chamber-ah nu chhuanawm chawimawina hun hi an buatsaih a, he hunah hian Serchhip Bawrhsap chuan Serchhip Venglai-a cheng A. Lalawmpuii hnenah chawi-mawina hi hlanin Bawrhsap chuan Lalawmpuii chu nu chhuanawm tak a nih thu leh he chawimawina hi a phu hle tih a sawi a. “A fapa vohbik hlawh-tling taka lehkha zir tira, sawrkar hna tha tak hmu thei khawpa a enkawl seilen mai bakah, Shalom Special School-a naupang dangte a hun puma enkawl zui zel tura a inpekna chuan chawimawi a phu hle a ni,” a ti.
Nimin-a Exceptional Mother chawimawina hun hi WCD Serchhip-a District Programme Officer Lalthlamuani Rokhum-in a kaihhruai a, District Mission Coordinator R. Lalvensanga hnen atangin chawimawina dawng tura thlanchhuah A. Lalawmpuii chanchin leh thlan a nih dan ngaihthlak a ni a. A. Lalawmpuii hnenah hian chawimawina thuziak (Memento) leh lawmman pawisafai Rs. 5,000/- chu Bawrhsap hian a hlan a ni.
He chawimawina dawngtu A. Lalawm-puii w/o C. Lalremsanga, Serchhip Venglai hian a fapa a enkawlna atangin he chawimawina hi a dawng a, a fapa hi thla riat a nihin lo puitling chho ta pawh nise rual a ban dawn lo tih an hrilh a, hei vang hian naupang enkawl dan bik zirtirin a theih ang angin a enkawl chho a. A fapa hian Serchhip Kawnpui Primary School-ah zirna bul tanin a theih ang anga hna te thawkin Mizoram Polytechnic Lunglei atanga a zirchhuah hnuah tunah hian PWD Serchhip Division-ah JE hna a thawk mek a, A. Lalawmpuii hi Vohbik te enkawlna Shalom Special School Serchhip ah a thawk mek bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!