Result tihchhuah dan thil thar a ni lo tih sawi

School Education Minister Dr. Vanlalthlana chuan tunhnaia Board Exam result an tihchhuah dan chu thil thar a ni lo tih sawiin, danglamna an siam kawngah dawih taka ke pen an tum lo tih a sawi.

Zirtawpni kaltaa Mizoram Education Inspecting Officers' Association General Conference Aijal Club-a neih a hmanpuina ah School Education Minister Dr. Vanlalthlana chuan tunhnaia result an tihchhuah dan chu thil thar a nih loh thu leh Board lianah leh State dangah pawh an hman lai reng a ni tih a sawi a. “Zirlaite hian an Exam-ah hian mark hnih khat lekin Division sang an pha lo thei a, mark hnih khat leka dinhmun inthlau taka dah hi naupang zirna lama chak lo zawk tan a tha lo,” tiin a titha tan chuan mark sang an hmuh hian an lawm tho thu leh a tichhe deuh tihnual thei Division tihlan chu tul an ti lo tih a sawiin, zirna lama mi entawn Finland phei chuan kum 20 chuang ranking hi an kalpui tawh lo tih a sawi. 

Education Minister chuan Inspecting Officer te chu zirna kawnga an thawhhonaah lawmthu hrilhin, Zirna kawnga an thawhhona ah danglamna an siam chho zel thu leh dawih taka ke pen an tum lo tih a sawi a. Tunhnaia danglamna an siam chu thawhhona rah a ni tih sawiin, Officer leh Zirtirtute thawhrimna rah a ni tih a sawi a. Inspecting Officer te chu Performance Grading Index-ah hma kan sawn theih nan ngaihtuahna hmang zel tur leh a tul chuan Workshop cum Round Table Conference te pawh huaihawt turin a sawm bawk.

MEIOA Conference ah hian lawmthu sawina hun hmangtu K.Lalsiamliani chuan Mizoram sawrkarin tunhnaia a tha zawnga danglamna a thlen hnalakah advertisement chhuah ziah te, aikal tih tawp te, Quarters sak hnathawh tha an tih thu te leh sawrkarin zirna kawnga hma a lakna hrang hrang lawmawm an tih thu a sawi bawk a ni.