Jail tang in document lem hmanga Jail tang chhuah tura hma a lak dan Police ten an sawifiah

Lunglei District Jail-a tang te chhuah tura document lem siamtu Jeremia Lalthangtura chu Police ten thu an zawhfiah hnuah District Jail Lunglei-a a nghet lova Ambulance driver hna thawk mek C.Laltlanhlua (31) , Republic Vengthlang, Aizawl chu a inhnamhnawih ve ngei nia hriat niin tun thla ni 7 khan District Jail-ah hian dahluh an ni.

Mizoram Police ten an thil chhuina chungchang an tihchhuah ah April 27, 2026 khan Lunglei Judicial District-a District & Sessions Judge R.Lalduhawmi hnen atanga FIR an dawn danin April 24, 2026 khan Lunglei District Jail-a UTP Judicial Custody-a awm mek mi Malsawmtluanga leh Dokapthanga te chu Court-ah inlanin April 13, 2026-a Court of District & Sessions Judge, Lunglei Judicial District lehkha leh April 10, 2026-a Guwahati High Court lehkha, April 24, 2026-a Court-a hearing nei tur leh Rs. 50,000 fine-a discharge bond-a an chhuahna tur order an neih thu tarlangin, heng mite hi April 23, 2026-ah Court-ah hian inlan tawhin May 8, 2026-a inlan leh tura tih an nih thu tarlan a ni.

He thil thlengah hian FIR thehluh a nih avangin Police te chuan chhui zuiin he thila mawhphurtu ber nia lang, Jeremia Lalthangtura (25), Zemabawk, Berawlui Veng, Aizawl tuna Dictrict Jail Lunglei-a tang mek leh C..Laltlanhlua (31), Republic Vengthlang, Aizawl, tuna District Jail, Lunglei-a a nghet lova Ambulance Driver hna thawk mek te chu an inhnamhnawih ngei nia hriain May 1, 2026 khan manin May 7, 2026 khan District Jail, Lunglei-ah dahluh an ni tih an sawi a. He an thil chhuina atanga alan danin Jeremia Lalthangtura hian convict mi 17 te hi lo bum kualin an case-ah appeal a siam sak theih thu leh a hmelhriat Ukil a lo biaksak tur thu tiamin pawisa a lo laksak thin a. Tangho hnen atang hian Rs.4,000/- atanga Rs. 50,000/- thlengin pawisa hi a lo laksak thin thu leeh pawisa an hmuh zawng zawng hi Rs.1,35,000/- bawr vel a ni tih sawiin, An pawisa hmuh te hi Jeremia leh C.Laltlanhlua te hian an lo insem thin tih hriatchhuah a ni tih an sawi a, Pawisa hi C. Laltlanhlua kutah emaw, a Gpay account-ah a lut thin a. C. Laltlanhlua phone leh banking transaction zawng zawng hi a remtihna thlapin Jeremia Lalthangtura hian Jail chhunga atang hian a hmansak thin niin an sawi bawk.

Document lem te hi Jeremia Lalthangtura hian hmun hnih, Rahsi Veng-a Xerox leh Printing tih theihna Computer dawr pakhat leh District Jail, Lunglei-a Office Computer-ah te a lo siam thin tih finfiah a nih thu Police te chuan sawiin, C.Laltlanhlua hian Office chahbi te lo dil chhuakin Jeremia-a'n Computer a hman lai hian a lo veng thin nia sawi a ni a. Heng document siamchawp te hi C. Laltlanhlua hnenah hlanin ani hian Jail thuneitute hnenah a pe thin a. Heng document leh Court order lem te hi Jail thuneitute hnena an thlen hnuah Jail thuneitute hian Order hmang hian Jail tangte an lo chhuah ve mai thin a, kumin January 30 leh April 18 inkar chhung khan mi 17 chhuah hman niin mi 13 te chu chhuichhuah an ni leh tawh a ni.