ZPM Thalai ten Sairang leh Kawnpui inkar kawng siam enfiahin kumin ah harsatna thleng lo tuah an ngai

ZPM Thalaite chuan NH-06 Sairang leh Kawnpui inkar kawng siam chu Inrinni khan a hmunah enfiah lehin Furpui hmachhawn zo tura NHIDCL leh ZPM Sawrkar hmalakna ah an lawm tih an sawi.

ZPM Thalaite hian a tum 8-na atan NH-06 Sairang leh Kawnpui inkar kawng siam mek hi enfiahin kumin February 21-a he kawng an enfiah hmasak ber tuma NHIDCL, J. Infratech Ltd. leh BR Goyal Ltd. ten an hnena intiamna an lo neih tawh, April leh May thla chhunga an chanpual siam zo vek tura an intiamna te an bawhzui tha tih an hmuh thu sawiin, Furpui hmachhawn zo tura NHIDCL leh ZPM Sawrkar hmalakna ah an lawm hle tih an sawi a. He hna hi zawhfel a la nih loh thu sawiin, tunah hian za zela 80 vel thawh zawh a ni tih sawiin, helai kawng enkawltu NHIDCL hnuaia Company pahnih - J Infratech Ltd. leh BR Goyal Ltd. te chu an hna hmachhawpte an zawhfiah nghal a ni.

ZPM Thalaite chuan Buichali leh Sairang inkar enkawltu J. Infratech te chuan ni 15 atanga 20 thawh tur hna an la neih thu sawiin, Buichali Lei leh Sairang inkar chu May 12, 2026 atangin an chhunzawm dawn a, harsatna an tawk a nih loh chuan ni 15 - 20 chhungin an hna te an zawhfel theih tur thu an sawi a. Buichali Lei leh Mualkhang inkar enkawltu BR Goyal Ltd. chuan an hna chanpual chu an zawh tawh thu leh NHIDCL lamin Inspection pawh an neih tawh thu an sawi a, a leilung zir loh vanga a tlo lo lai tur awm ang te NHIDCL-ah report pein helai kawnga an chanpual chu zofel tawhah an inngaih thu an sawi a ni.

He hunah hian ZPM Thalai President Jeje Lalpekhlua chuan NH-06 Sairang leh Kawnpui inkar hi nikum Furah Sawrkar leh pawl hrang hrang ten kan buaipui nasa tih sawiin, “ZPM Thalai chuan Inspection leh Monitoring te pawh kan mawhphurhna ah dahin,  Group-a inthenin kartin detailment siamin kan tlawh thin a, nikum ngaihtuah chuan tun dinhmunah chuan hmasawnna tam tak kan hmu a, hetianga hmasawnna kan hmuh theih chhanah kan Sawrkar hotute - a bikin kan Chief Minister Pu Lalduhoma'n theihtawp a chhuah a, NHIDCL leh Company-te nen sawihona te neiin, Vawiin-a hmasawnna kan hmuh hi ZPM Sawrkarin chak taka a nawr vang niin kan ngai a ni,” a ti.

ZPM Thalai President chuan hna hi thawh zawh a la nih loh thu leh tunah hian 80% vel tawh zawh tawh a nih thu sawiin, “Hmabak la awmte pawh reilote chhunga thawh zawh beisei a ni,” a ti a. “Vawiin-a kan dinhmun atang chuan nikum Fur-a  harsatna kan tawh angte tawk tawh lo turin kan in ngai a, kan dan zawh loh khuarel chhiatna a thleng te a nih ngawt loh chuan motor lian tangte pawh a awm tawh loh kan beisei a ni,” a ti bawk.