Aizawl-ah UNNATI Scheme inhrilhfiahna hun buatsaih

Nimin khan Aizawl Khatla-a Royale Lalawi Hotel Conference Hall-ah UNNATI Scheme in a tum te inzirtirna leh inhrilhfiahna hun buatsaih a ni a, Commerce & Industries Minister F. Rodingliana chuan khuallian niin a hmanpui a ni.

Sawrkar laipui-a Department for Promotion of Industry and Internal Trade (DPIIT) leh Mizoram sawrkar Department of Commerce & Industries tangkawp buatsaih he zirhona hunah hian C&I Minister F. Rodingliana chuan hun rei tak chhung kan ram leilungin a zir tawk loh avangin investors ten rawn luh an hreh thin thu leh chu harsatna chu KMMTTP in a rawn thlak danglam mek thu sawiin, international border thui tak kan neih te chu a hlutna hre tur leh hemi behchhan hian UNNATI Scheme hmang tangkai thiama, investors tam zawk hiplut thei tura tan la zel turin he huna kalkhawm te chu a chah a ni.

He hunah hian DPIIT-a Nodal Officer Karampaul Singh chuan UNNATI Scheme nihphung sawifiahin, he Scheme hnuaia Mizoram dinhmun a sawifiah a, Mizoram chu North-East State dangte aia an pawisa dawn theih a tam zawk thu sawiin, Mizoram tan vbc. 453 lai dah a nih thu leh mi pasarih chiahin registration an la ti chu a pawi a tih thu a sawi a, application 26 chauh Mizoram atanga an la dawn thu a sawi a. Mizoram chu Zone-B, hlawkna tam zawk tel theihna Zone a awm an nihna te chu hria a, tun aia nasa zawka Scheme hi hmang tangkai turin kalkhawmte a chah bawk a ni.

Nimin-a he hun hman ah hian DPIIT Director Rajesh Panwar pawhin Mizorama investor-te leh entrepreneur-te tana an inhawn thu leh zawhna leh harsatna an neih apiangte chu chinfelsak an inhuam thu a sawi a. Commerce, Industries Department-a Joint Director Lalrin-awma pawhin thu a sawi bawk a ni.