Special Blind School kum 25 tlin lawmna neih a ni

Samaritan Association for the Blind chuan nimin khan Special Blind School kum 25 tlinna chu Durtlang Presbyterian Kohhran-a M. Suaka Hall-ah an lawm a, he hun hi Chief Minister Lalduhoma chuan khuallian niin a hmanpui a ni.

Nimin-a he hun hman ah hian Chief Minister chuan Mizoram mipui tam zawk chuan he School hlutzia leh tangkaizia hi an ngaihtuah ngai lo mai thei tih sawiin, “Kan unau, Mit thalote tana a hlutna hi sawifiah thiam phak loh khawpa hlu a ni,” a ti a. “He School a lo awm hma zawng kha chuan Mizoram-ah Mit thalo te puala zirna In kan nei ngai lova. Samaritan Association for the Blind ten theihtawp chhuahin in han bei a, sawrkar laipuite dawrin Grant te in haichhuak a, School in din ta a. Mit thalote tan beiseina meichher in rawn chhi eng a. An beisei ang ngeiin zirna tha an hmu a. Vawiin-ah chuan he School atanga zirchhuak mi hlawhtling tak tak sawi tur an lo awm ta fur mai a ni,” a ti a. Sawrkar pawhin a hlutzia a hriat avangin Adhoc Status pein Zirtirtu a attach a, Middle Section bik hi Provincialize tura ngaihtuah tur zingah an dah thu leh PPP mode-a kalpui pawh a tha zawk thei tih a sawi a. Hostel Building pakhat ah mipa leh hmeichhia an la awmkhawm avangin Girls Hostel an mamawh tih hriain Handholding atangin Hostel sakna tur cheng nuai 50 an ruahman fel tawh tih a sawi bawk.

He hunah hian Bialtu MLA leh PWD Minister Vanlalhlana chu Khual zahawm niin a Bial chhunga awm he School hi a chhuan thu leh a enkawltute chungah a lawm thu sawiin, “In tan tih theih ka neih phawt chuan ka theihtawp ka chhuah zel ang. Tunah pawh MLA Fund atanga thawh theih project rawn nei ula, kan thawk dawn nia,” a ti bawk.

Nimin-a Special Blind School Silver Jubilee lawmna inkhawm ah hian Pastor Gospel Thanmawia chuan hunserh hmangin Samaritan Association for the Blind-a Executive Secretary RK. Vanlalringa chuan report a pe a. An Association hi kum 1990 a din a ni a, Special Blind School hi kum 2001 May thla atanga bul tan a ni. thung a A kum hmasa berah zirlai 16 awmin a hnuah chuan kumtin zirlai naupang 30 nei ziah ang an ni a. Kumin bikah hian zirlai 35 awmin Mizoram bakah Tripura, Manipur, Assam leh Myanmar atangin an lo kal a ni. He School-ah hian Primary atanga High School thleng a awm a, HSLC hi kum 17 chhung zaa zain an pass tawh a. He School-a zirchhuak mi 22 in sawrkar hna an thawk tawh a. Sawrkarin Adhoc Status a pek bakah Mathematics zirtirtu a attached a, zirlaibu leh an mamawh dang a tum thin bawk a ni.

Zirlai naupangte hian mi thahnemngai tanpuitu (sponsor-tu) mimal, pawl leh Kohhran an nei hlawm a, heng zarah hian tun thlengin tluang takin lehkha hi an zir theih phah nia sawiin, Chief Minister Lalduhoma hian naupang pathum a sponsor mek a ni.