AMC-a Corporator thar te bakah Mayor, Deputy Mayor leh Executive Corporator te lakluh an ni

Aizawl Municipal Corporation (AMC) Inthlanpui neih zawh taka Corporator thlan thar mi 19 te lakluhna Inkhawm chu nimin khan neih niin hemi rual hian Mayor leh Deputy Mayor thlan nghal a ni a, Executive Corporator tur mi 4 (pali) te pawh ruat nghal an ni bawk.
April 21-a AMC Inthlanpui neih zawh taka thlantlin Corporator mi 19 te lakluhna Inkhawm hi nimin khan Aizawl Thuampui-a AMC Board of Corporators (BOC) Meeting Hall-ah neih a ni a, he hun hi Municipal Commissioner Joseph H. Lalramsanga chuan kaihruaiin Corporator thar te hming a chhiarchhuah zawhah Aizawl District Magistrate, Er. Lalhriatpuia chuan Aizawl Municipality Corporator thar 19-te chu India Dânpui laka rinawmna thutiam (Oath of Allegiance to the Constitution of India) laktirin a la lut a. He hunah hian Chief Minister Lalduhoma, Home Minister K. Sapdanga leh Assembly Speaker Lalbiakzama bakah Minister C.Lalsawivunga, Dr. Vanlalthlana, B.Lalchhanzova, Prof. Lalnilawma leh Lalnghinglova Hmar te bakah Member of Parliament (Rajya Sabha) K. Vanlalvena leh MLA Lalchhuanthanga leh Ginzalalate te bakah sawmbik mi pawimawh ten an telpui a ni.

Corporator te lakluh an nih hnuah hian The Mizoram Municipalities (Procedures & Conduct of Business ) Rules 2007, Sec 4 in a phut angin Aizawl Mayor leh Deputy Mayor thlanna neih nghal niin Candidate dang an awm loh avangin Rules Sec 4 (5) tlawhchhanin Aizawl Mayor atan Ward No. VI Corporator H. Lalremtluanga leh Deputy Mayor atan Ward No. XVI Corporator R. Lalawmpuii te chu tlinga puan an ni a. Mayor leh Deputy Mayor te hian thutiam (Oath of Secrecy) an la nghal bawk a. Mayor thlan thar H. Lalremtluanga chuan Executive Corporator tur mi 4: Christina Roluahpuii Sailo (Ward No. VIII), Vanlalhruaia (Ward No. XIII), Vanlalfaka (Ward No. III) leh K. Lalrodinga (Ward No. XVIII) te a ruat a, Executive Corporator te pawh hian Oath of Secrecy an la ve nghal a ni.

Aizawl Mayor thar H. Lalremtluanga chuan an Manifesto behchhanin hmalak hmasak tur an zirchiang dawn tih sawiin, bultan thar tur an nih angin engkim tharlam taka kalpui an tum dawn tih thuthar thehdarhtu ten an kawmna ah a sawi a. AMC chu kum 15 a kal chhungin hruaitu hmasate theihtawp chhuahna hnuaiah hna tam tak thawh niin, an thlen chin pawh hmuh theihin a awm tih sawiin, ennawn leh siamthat ngai tam tak a awm rualin, a tha sa leh rin nawn tur pawh a awm thu a sawi a, chung chu Officer te nen en hovin hmalak an tum thu a sawi a. Tun atanga reilote ah thutkhawm pawimawh kovin, mipuite hnena an Manifesto semchhuah te zirchiangin ngaihpawimawh hmasak tur te an en dawn thu leh bultan thar tur an nih angin engkim tharlam taka kalpui an tum dawn thu a sawi a ni.