Neihloh khaw sawnna tur ruahmanna pawmin In sakna tur nuai 15 theuh pek tum an ni

Nimin khan Chief Minister Lalduhoma hovin Neihloh Village Planning Committee chu thukhawmin Neihloh khaw thar tur Master Plan an thlirho a, Neihloh khuaa chhungtinte chu an In thar sakna tur cheng nuai 15 pek vek tura ruahman a ni.
Serchhip District-a awm Neihloh khua hi a khaw pum hi leilung chetna hmun leh khuarel chhiatna avanga him tawk tawh lo a nih avangin an khaw ramchhung hmun danga insuan mai thain a khaw mipuite leh sawrkar chuan a hria a. Hmalakna pawh engemaw chen kalpui ni tawhin a khaw hmun thar tur an vat fai tawh a, khaw chhung inkalpawhna kawng laih tan tawh niin mipui nitin mamawh petu Department ten engemaw chen hma an lo la tawh bawk a ni. Nimin-a Chief Minister Lalduhoma hova  Neihloh Village Planning Committee thutkhawm CM Conference Hall-a neih ah hian UD&PA Department-a Town & Country Planning chuan Master Plan chu sawifiahin. Master Plan hi Survey vawi nga (5) an neih hnua an siam a ni a, an khaw thar hi Hectare 60 bial-a zau tura duan, Plot 105 nei, Plot tin hi square meter 800 aia zau vek an ni a. Plot pakhat chhungah In pakhat bak sak phal loh nise, In hi sak belh dawn chuan plot tharah zel dah nise an ti a. A khua hi tihzauh zel theih tura duan a ni.

Master Plan-ah hian vantlang hmunhma pawimawh Community Hall, School, VC House, Biak In, Tanky leh ruahtui khawlna hmun tur te, Solid Waste Management Centre te, Transformer dahna tur te, Parking Area leh Green Area tur te fel fai taka duan vek niin In sak dan tur ruahmanna (Minimum Standard) pawh a keng tel a. Nimin-a thukhawm hian Master Plan hi siamthat ngai thenkhat an siam danglam hnuah an pawm a. Hmalatu tur Nodal Agency an ruat nghal a, State Level-ah chuan Planning & Programme Implementation Department ruat niin District Level-ah Serchhip DC chu ruat a ni bawk a. Master Plan pawm hnu hian Mizoram Urban & Regional Development Act 2025 hnuaia Notification tihchhuah a ni anga, tihhlawhtlin a nih chuan khaw mawi leh fel fai tak, chhuanawm tham ni tura ngaih a ni.

Neihloh khuaa chhungtinte chu an In thar sakna tur cheng nuai 15 pek vek an ni dawn a, Sum leh pai hman belh tur nei ten lian zawk leh tha zawkin an chenna tur In hi an sa anga. In sak dan tur hi a hniam lam bituk (minimum standard) siam sak vek a ni thung. Chhungkaw thenkhatin In sak tan an duh tawh avangin mamawh hmasate chak taka bawhzui nise an ti bawk.

Neihloh khua hi kum 1898-a din niin tunah hian chhungkaw 77 awmin mihring 400 chuang hlek an awm mek nia chhinchhiah a ni a. Aizawl-Thenzawl-Lunglei kawngpui atanga tehin an khaw thar tur hi khaw hlui aiin a hnai zawk a, a ram a tha tawk hle a ngaih a ni bawk.