Ramdang atanga phalna nei lova Sawhthing lak khap

Serchhip District Magistrate chuan Myanmar atanga phalna nei lova Serchip District-a Sawh-thing lakluh, phurh leh lei leh hralh khapna thupek a tichhuak.
Hemi chungchanga tun thla, May 6 a thupek a tichhuah ah Serchhip District Magistrate Paul L. Khuma chuan tunlai hian mi thenkhat ten dan lovin Serchhip District chhungah Myanmar lam tharchhuah Sawhthing an lalutin an hralh thin tih hriat a nih thu leh hetianga phalna nei lova Sawhthing lakluh leh hralh hi Customs Act 1962, the Foreign Trade (Development and Regulation) Act, 1992 bakah Dan hrang hrang bawh-chhiatna a ni tih a tarlang a. Hetiang thil hian ramchhunga loneitute tharchhuah Sawhthing hralh kawngah harsatna nasa tak siamin sawrkar sum lakluh tur nasa takin a tihbuai thu leh Dan kenkawhna kawngah harsatna lian tak a thlen bawk thu te a tarlang a. Hei vang hian Section 163 of Bharatiya Nagarik Suraksha Sanhita, 2023 in thuneihna a pek angin Serchhip District chhungah Customs atanga phalna (license) leh lehkha pawimawh dangte nei lova Myanmar atanga Sawhthing lakluh (import), phurh (transportation), dahthat (storage), lei leh hralh (sale and purchase) te khap tlat a nih thu a tarlang a ni.

Serchhip District Magistrate thupek ah hian thupek zawm lo te chu Section 223 of Bharatiya Nyaya Sanhita, 2023 dan hmanga hrem theih an nih thu leh thupek hi chhuah a nih (May 6, 2026) atanga thla hnih (2) chhung huam tur a nih thu te tarlan a ni bawk.