All India Radio (AIR) kum 90 tlin lawmna pualin Aizawl-ah ‘Musical Concert’ buatsaih a ni

All India Radio (AIR) Aizawl chuan All India Radio kum 90 tlin lawmna kal zelah nimin khan Musical Concert an buatsaih a, he hun hi IPRP&S Minister B. Lalchhanzova’n Khuallian niin hun a hmanpui a ni.

Aizawl Tuikhuahtlang Central YMA Hall-a he hun hman ah hian IPRP&S Minister B. Lalchhanzova chuan All India Radio kum 90 a tling ta chu a lawmpui thu sawiin, Mizo hnam zia leh tawng vawnhim kawngah tangkai takin hna an lo thawh tawh thu leh Mizo hnam nun vawnghimtu pawimawh tak an nih thu a sawi a. Tunlai khawvelah hnam ral tam tak an awm tawh tih sawiin, Hnam ziarang leh tih dan hrang hrang vawnhim kawngah theihtawp chhuah a tul thu a sawi a. Mizo thu leh hla chawilar kawngah te, mahni hnam ngaisang tura inzirtir chungchang ah te leh nun dan tha midang zirtir kawngah an thawh hlawk hle tih a sawi bawk.

He hunah hian AIR Aizawl Director leh Mizoram Cluster Head DR. Lalropuia pawhin All India Radio bul tan dan sawiin, India ram zalên hma atang tawhin mipuite awi tleitu ber an lo ni tawh thin a, thuthar puanchhuahna ringawt ni lovin India hmasawnna tura thawktu sawrkar leh mipuite thlunzawmtu tangkai tak an ni tih sawiin, Viksit Bharat 2047 hmalaknaah pawh Radio chuan mawhphurhna pawimawh tak a neih thu a sawi bawk.

All India Radio (AIR) hi June 8, 1936-ah din niin New Delhi-ah Headquarters a awm a, AIR Aizawl hi India ram puma AIR Station 230 zinga pakhat niin All India Radio kum 90 tlin lawmna pual hian Aizawl mai bakah Cluster hrang hrangah hun buatsaih a ni a. All India Radio (AIR) Aizawl hian kumin hian kum 60 tlingin hemi pual hian Programme hrang hrang buatsaih chhoh mek a ni bawk a. AIR kum 90 tlin pual hian AIR Aizawl chuan May ni 8, 2026-ah Walkathon a buatsaih dawn a, a lawmna pui ber chu June ni 8, 2026-ah Vanapa Hall-ah Chief Minister Lalduhoma hova neih a ni ang.

Nimin-a he hun hman ah hian All India Radio (AIR)-a Top Grade Artist Vanhlupuii leh ‘A’ Grade Artist pali - Laltlanthangi Pachuau, Siampuii Sailo, C. Vansanga leh Rualthankhuma Chhakchhuak te chawimawina hun hman niin Minister B. Lalchhanzova chuan heng mite hnenah hian chawimawina a hlan a. zai leh lam nen hun hlimawm tak hman chhunzawm niin Additional Director (Program)/Head of Programme, AIR Aizawl Biakchungnunga chuan lawmthu sawiin hun a khar a ni.