Bana Kaih Scheme hnuaia hmalakna kal mek thlirho a ni

Mizoram State Policy Coordination Committee (MSPCC) chu nimin khan thukhawmin Bana Kaih Scheme hnuaia hmalakna tur pawimawh hrang hrang an sawiho.

He thutkhawm P&PI Department Meeting Hall-a neih hi MSPCC Vice Chairman KC. Lalmalsawmzauva chuan kaihruaiin Bana Kaih Scheme Loan Component hnuaia dilna thenkhat, Partner Bank ten an lo kir tak te chu zirchian a ni a. Dilna 153 chu chhan hrang hrang avangin Bank chuan Loan an pek mai theih loh thu an ziah chu Partner Banks aiawhte leh Implementing Department aiawhte nen sawihovin, dilna thenkhat chu hnawl tlang a ni a. A diltu ten an inhnuklet avanga Bank ten Department lama an kir let tak te bakah Bank ten an zirchian hnu a pek tlak lova an nghaih te, Bank dang emaw Scheme dang hnuaia pek a fuh zawk dawn avanga kir leh te a ni hlawm a ni.

Heng bakah hian nimin-a thutkhawm ah hian CM Special Package hnuaia dilna lut 224 chu thlirho niin, Agriculture Department hnuaiah 19 leh Tourism Department hnuaiah 11 chu pawm a ni a, Loan assistance dilna 50 enho zingah 35 pawm a ni bawk. He thutkhawm ah hian MSPCC Member te bakah Implementing Department hrang hrang Nodal Officer-te leh Partner Banks atanga Nodal Officer te an tel a ni.