Mizoram-ah Union Textiles Minister Giriraj Singh rawn zinin STI leh ZOHANDCO a tlawh
Union Textiles Minister Giriraj Singh hian Pathianni khan Aizawl rawn thlengin nimin zing khan Zemabawk-a Sericulture Training Institute (STI) chu a tlawh a, helai hmunah hian Muga silk pangang khawina thing – Som Tree phunin hemi hnu hian STI Conference Hall-ah Silk Pangang hmanga eizawng te leh puantahtute nen an inkawm a. He hunah hian Union Textiles Minister chuan Mizoram-a khaw 211-a Farmer-te chu chibai bukin Mizorma-ah thu tha hrilh tur chauh ni lovin, anmahni nena inzawmna thuk siam tura lo kal a ni tih a sawi a. Mizoram chu hmarchhak State zawng zawng zingah Silk chi 4 - Muga, Eri, Mulberry leh Tasar nei thei awmchhun an ni chu vannei a tih thu sawiin, District 11-a farmer 6000 leh mimal 19,000 zet chuan Silk hi an innghahna ber leh an eizawnna ber atan an hmang tih a sawi a. Mizoram khaw awm dan (climate) leh lei (soil) chu Sericulture tan a tha em em tih sawiin, Mizoram Sericulture pawh tunhnai khan za zelah 5.5-6 vel zeta hmasawnna an hmuh thu a sawi a ni.
Union Textiles Minister chuan Mizoram-a Muga Silk Pangang khawitute chu hmahruaitu - Muga Leader-ah siam a tum tih sawiin, Mizoram tan Silk Samagra 2.0 hnuaiah cheng vbc. 4679.86 zet a sanction thu a sawi a. Mizoram chu Cluster-ah inthen se a duh thu sawiin, District 4 - Lunglei, Champhai, Saitual leh Siaha chu Muga District atan; District dang zawng chu Silk Variety dang khawi nan hmang se a ti a. Cluster siama hmalak hian farmer-te zingah hmasawnna chak zawka a thlen avangin Cluster behchhana hma an la a nih chuan Central Silk Board-in a tanpui dawn tih a sawi a. Silk farmer ten hma an sawn theihna turin an inkarah inelna thianghlim buatsaih turin sawrkar thuneitute chu chahin, farmer te tan tehfung hrang hrang siam tur leh a titha zualte tana lawmman siam sak turin a chah a. Silk hmanga puantah leh puanthuia eizawngtute chu National Institute of Fashion Technology te nena thawhho dan zawn sak a tum thu a sawi bawk a ni.
Hemi hnu hian Union Textiles Minister Giriraj Singh hian Aizawl-a Mizoram Handloom and Handicrafts Development Corporation Limited (ZOHANDCO) Office pawh tlawhin Union Textiles Minister pual hian ZOHANDCO hian Exhibition an buatsaih a, Mizo puantah hrang hrang te leh thiamhnangdeh lam hawi an siamchhuah an pholan te chu a hmunah a en a. He hunah hian Union Minister chuan Silk vang leh tha bika an sawi - Muga Silk chu Mizoram-a a tam thu sawiin, Mizoram chu ‘Golden State’ tih hiala koh a duh tih a sawi a. Kum 2035-ah chuan Silk Metric Ton 1000 aia tam an dehchhuah theih ngei a beisei thu leh Central sawrkar chuan kuthna-thawktute hmasawn zelna atan sum pekchhuah an ui loh thu a sawi bawk.
Union Minister chuan hmeichhiate chawikan pawimawhzia sawiin, Lakhpati Didi scheme chu tangkai zawka hmang turin puantahtu nuho a chah a; he scheme hnuaiah hian tun dinhmunah cheng nuai 5 thleng pek theih niin, nuai 10 thlenga dawn theih tura siam an tum thu a sawi bawk.
Union Minister in heng hmun te a tlawhna ah hian Sericulture Minister Lalthansanga chuan tawiawmin sawrkar laipui Scheme hrang hrang kaltlanga hmasawnna an hmuh thin avangin lawmawm a tihzia a sawi a; amaherawhchu, Sericulture kaihhnawiah hmasawnna ruhrel - infrastructure din tur tam tak a la awm avangin Central Sawrkar puihna a ngen a. Weavers’ Service Centre, Eastern Zone, Zonal Director S Bandyopadhyay chuan an hmalakna hrang hrangte a hrilhfiah nghal bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!