MZP in kumin HSSLC Exam result chhuaka Mizo zirlai titha te chawimawina an hlan

Mizoram Board of School Education (MBSE)-in kumin-a Higher Secondary School Leaving Certificate (HSSLC) Exam result a tihchhuah taka science, Arts leh Commerce Stream-a pakhatna theuhte chawimawina hun chu nimin khan Mizo Zirlai Pawl (MZP) chuan buatsaihin Minister Prof. Lalnilawma chuan khuallian niin a hmanpui a ni.

MZP General Hqrs. in Aizawl-a I&PR Auditorium-a zirlai tithate chawimawina hun an buatsaih ah hian RD&A Minister Prof. Lalnilawma chuan MZP-in zirna kawnga tithate chawimawina hun a buatsaih thin chu lawmawm a tih thu sawiin, Topper-te chu inthlahdah mai lo tur leh sang tak an thlen tawhna chu a aia sang zawk thlen theitu a ni tih hria a, tang mar zual sauh sauh turin a chah a. Tuna an thil tawn chu duhthlanna dik an hman vanga an thlen a ni tih hre tel tura chahin, an hma hunah pawh duhtlanna dik pawimawhzia chu hre reng turin a fuih bawk a. Zirlai kalkhawmte chu mahni zawn theuhvah hmasawn tum a, hlawhtlinna chang chho zel turin duhsakna a hlan nghal a ni.

He hunah hian MZP General Headquarters President, Dr. C. Lalremruata leh MZP Adviser Lalhruaitluanga Chawngte te pawhin Zirlaite fuihna thu sawiin, ram leh hnam tana chhenfakawm tak nih tum theuh turin zirlai kalkhawmte chu an chah a. MZP President Dr. C. Lalremruata chuan Zirlai kalkhawmte chu Kohhran leh khawtlang bakah ram inrelbawlna leh thil pawimawh hrang hrangte zirchianga hre ve zel turin a chah a. Ram leh hnam chu an kut zala la tla thei reng a ni tih hre tura fuihin, an kal zelna turah duhsakna a hlan nghal a. MZP Adviser Lalhruaitluanga Chawngte chuan hnam rilru put pawimawhzia leh lehkhabu chhiar pawimawhzia te hmangin he huna zirlai kalkhawmte chu a fuih bawk a ni.

MZP in nimin-a zirlai titha te chawi-mawina hun an buatsaih ah hian HSSLC result chhuaka Mizo zirlaite zinga Arts Stream-a titha ber Lalnunhlui d/o Lalbiakliana Sailo; Science Stream-a titha ber Lalmoipuia Lawmzual s/o HL. Lawmzuala leh Commerce Stream-a titha ber Vanlaltleipuia s/o Sammy Lalmuanzuala Chhangte te hnenah chawimawina hlan an ni a, an vai hian St. Paul's HSS-a zirlaite vek an ni. He hun hi MZP General Hqrs. a Vice President Sang-hmingthanga chuan kaihruaiin MBSE-in  HSSLC result a tihchhuah tak nikum leh kumin a mite zirchianna report chu MZP General Secretary C. Lalhmingsanga hnen atangin ngaihthlak a ni bawk.