Chief Minister in Union Transport Minister a kawm

New Delhi-a cham mek Chief Minister Lalduhoma chuan nizan hmasa khan Union Minister of Road Transport & Highways Nitin Gadkari kawmin Mizoram-a kawngpui chungchang an sawidun.

He inkawmna ah hian Chief Minister Lalduhoma chuan Aizawl - Thenzawl kawngpui National Highway-a puang tura a lo ngen tawh thin chu sawipuiin, Union Minister Nitin Gadkari chuan DPR siam mek a nih thu leh sanction thuai tum a nih thu a lo hrilh a. Mamit to Bairabi NH-06 Spur chu strengthening ti tura a ngenna pawh Union Minister hian sanction nghal a nih tur thu a hrilh bakah a senso tur awm ang pawh an sawi dun nghal a. Vairengte to New Vervek NH-306A kawng chhuat siamtha tura ngenna Nitin Gadkari hian State PWD ruahmanna (proposal) a siam that ngai thenkhat te siam that a nih hnuah sanction a nih tur thuin a lo chhang a. NH-502 Zero to Siaha double lane-a siam sak tura ngenna chu Land Acquisition man sang lutuk tihhniam dan lo zawng turin State sawrkar a lo ngen let a, sanction thuai tura MoRTH in hma an lak tur thu a lo hrilh a ni.

Hei bakah hian Chief Minister chuan NH-108/NH-44A kawng a Teirei Bridge leh Langkaih Bridge chu Tripura nena inkalpawhna pawimawh a nih avangin Lei tha mamawhna a sang hle tih sawiin, a thawhna tur sum sanction thuai a tul thu a thlen a. Union Minister hian DPR te siam that a (modified) submit ran nise, MoRTH duh dan ang a nih chuan sanction thuai a nih tur thu a sawi a. National Highway ni thin, Double Lane alignment thar a kal tak avanga ngaihsak zui loh a awm, State PWD a la hlan fel si loh kawngpui pawimawh paruk te tana One Time Improvement chungchang Chief Minister in a sawi chu Nitin Gadkari hian National Highway road hlui an nih ngei chuan sanction a, resurface tur a nih thu Chief Minister hi a lo hrilh a. Mizoram chhunga kawngpui te an lo tlo zawk nan kawngpui project thar te chu Concrete Road-a siamsak tura a ngenna chungchangah Nitin Gadkari hian Cement factory lian nen inbe rem a, Cement man tlawm deuh zawka lei a, Concrete Road siam theih a rinawm thu sawiin, MoRTH leh NHIDCL Officer te pawh Bitumen man 40% laia a to chhoh tak avangin ngaihtuahna seng a, hma la turin a hrilh nghal a ni.