Tourism Secretary sawipui

Tourism Minister Lalnghinglova Hmar chuan nimin khan Tourism changtu Secretary to Government of India Bhuvnesh Kumar chu New Delhi-ah kawmin Mizoram Tourism hmasawnna an sawi dun.

Nimin-a an inkawmna ah hian Tourism Minister Lalnghinglova Hmar chuan tunhnai ah Mizoram-ah khualzin an pun mek thu te, chumi lo dawngsawng tura inbuatsaihna leh inzirtirna  (capacity building & awareness campaign) tha zawk kalpui a tul thu te, Mizo khawtlang nun pawlh dal lova khualzin dawnsawn theih nana Mizoram sawrkar ruahmanna leh hmathlir neihte a sawi a, sawrkar laipui nen he mi kawnga thawhho theih dan tura rawtna a neihte a sawi a. “Mizoram chu khualzin tlawh châkawma siam piah lamah khualzinte châm rei theihna hmun ni se kan duh. Hei vang hian an lo thlen hlima Aizawl khawpui leh a chhehvela hun rei zawk an hman theih dan leh chuta tanga Mizoram hmun danga an zinchhuah dan ruahmanna kan siam chho mek,” tiin Aizawl khawpui chhehvel khualzin hipna hmuna chei dan turte a tarlang a ni.

He hunah hian sawrkar laipui-a Tourism Secretary Bhuvnesh Kumar chuan tunhnai mai ah Aizawl leh Thenzawl a tlawh thu te, khualzin hip tura theihna a neih san dante a sawi rualin, “Aizawl atanga banphak maiah khualzin hipa thil lian tham din hi a tul takzet a ni,” a ti a; sawrkar laipui hmachhawp ‘One State: One Global Destination’ project chu khualzin luh tamna ber, riahna leh ei leh in lamna remchang tamna ber Aizawl atanga banphaka duan tha a tih thu a sawi bawk.

He hunah hian Minister Lalnghinglova Hmar chuan 'Winter Capital of India' nih tuma hmalakna a awm mek thu leh, a tul anga sawrkar laipui puihna an mamawh dante a sawi a, Bhuvnesh Kumar chuan hun bik tinzawn neia khualzin hip tum chu thil tha leh finthlak tak a nih thu sawiin a Office atanga a thlawp tlat tur thu a sawi bawk.