CADC-a BJP ten Mizoram sawrkar an dem thu sawi

Chakma Autonomous District Council (CADC)-a BJP chuan Zoram People’s Movement (ZPM) kaihhruai Mizoram State sawrkar chuan Financial Year 2025–2026 atana sawrkar hnathawk hlawh tang chu Financial Year 2026–2027 1st Quarter allocation nen a la pekchhuah loh avangin an dem thu an sawi a. Hetianga dik lo taka tihkhawtlai a ni hian Mizoram chhunga Autonomous District Council-te chu State Sawrkar-in a ngaihthah zia leh thliarhranna a nei chhunzawm zel tih chiang takin a pholang niin an sawi.

Thuchhuah an siamah CADC-a BJP chuan CADC hnathawkte thla nga (5) chhung hlawh cheng nuai 6,377.79 pek loh a la nih thu tarlangin, kum hmasa lamah chuan hetiang deficit sum hi 1st Quarter nen hian sanction leh tihchhuah fo a ni a, hei hian Council-te chu mumal taka an kalpui theih nan a puih thin thu a sawi a, kumina hetiang thil thleng hian inthlak danglamna siamin sum lama harsatna nasa tak a siam thu leh CADC chhunga hnathawkte, rorelna, leh administrative function pawimawh tak takte chu nasa takin a nghawng thu an sawi a ni.

Hemi chungchangah hian nimin khan CADC-a BJP District hruaitute chuan Chawngte-a Sub-Divisional Officer (Civil) kaltlangin Governor hnenah lehkha an thehlut a, deficit sum chu tuna State Budget 2026–2027 atanga pe turin an duh thu an sawi a ni.