Engineering zir theihna hmang tangkai turin chah

Central Seat Allocation Board (CSAB) hotute chuan Mizoram a zirlai naupangte tana CSAB leh JOSAA Counseling kaltlanga Engineering zir theihna remchang bawhpelh lo turin zirlaite an chah.

    Nimin khan Aizawl Press Club-ah thuthar thehdarhtute kawmin CSAB aiawh Santhani Chakraborty chuan NIT Mizoram-ah hian kum tin seat 190 a awm thu leh za zela 50 (seat 95) chu Mizoram-a Zirlai (Home State quota)-te tana dah bik a nih thu a sawi a; kumin June ni 2 atangin JOSAA website a inhawng anga, JoSAA Round 6 a zawh hnuah Seat la awm ang angte chu CSAB Special Round hmanga hnawh khah leh a ni ang tih a sawi. Mizoram tana tha ber chu CSAB-NEUT a nih thu sawiin Santhani Chakraborty chuan, hei hi hmarchhak State-te leh Union Territories tana seat dah bik a ni a, Mizoram tan hian BE/B.Tech-ah seat 116, Architecture-ah seat 5 leh NERIST-ah Seat 8 dah niin, June chawlhkar 3-na velah Registration a intan dawn tih a sawi a; JOSAA-ah hian pawl 12-ah mark zaa 75 hmuh a ngaih rualin, hmarchhak State-te leh UT-a chengte tan zaa 45 hmuh a ngaih thu leh SC/ST tan bik zaa 40 hmuh a tawk thu a sawi a, hetihrual hian JEE Mains-ah rank neih a ngai thung tih a sawi. CSAB hotute chuan Pharmacy (B.Pharm) zir duh tan JEE Main exam a ngai lo a, pawl 12 mark aggregate atanga thlan an nih thu an sawi bawk a ni.