February 2, 2026-ah Sawhthing lei tan leh tum a ni

Mizoram sawrkar chuan thlai thar lei hun tur a ruahman thar leh ta a, Sawhthing pawh nakum February 2 atanga lei turin ruahman a ni.

Nimin khan Chief Minister Lalduhoma hovin Mizoram Agricultural Marketing Board chu CM Conference Hall-ah thukhawmin thlai thar lei leh hralh chungchang thil pawimawh hrang hrang sawiho niin kumin Sawhthing lei tan ni atan February ni 2, 2026 chu an ruat a. Hmunphiah pawh February leh March 2026 chhunga lei tur niin Aieng leh Mizo Hmarcha chu February atanga April thla chhung lei a ni anga, Buhhum pawh tun (2025) November-ah lei tan tawhin kumthar January thla thleng lei a ni ang.

Thlai thar lei ah hian SSC 65 ten rualkhai taka a man (a rate) an kalpui theih dan tur ruahmanna siam a ni tawh dawn bakah SSC leh DAMC te hnenah an chetvelna sum mamawh zualpui pek an ni anga. Buffer stock awm tawh lovin Sawhthing Society member-te ta chauh lei a ni anga. Sawhthing Society, Cooperative Society a inziaklut tlakte chu lo inziaklut vek turin beisei an ni. Hei bakah hian State pawn atanga Sawhthing Slice Dry lei duh an tam thin avangin Mizo Innovator pahnihte thilsiam, Sawhthing channa leh Ur rona khawl, Rapchung Technology leh Tapchhak Technology khawlte chu Handholding Scheme atanga lei an rel a, a enkawltu turte chu an hnathawh that dan a zira ngaihtuah a ni ang.

Hmunphiah ro chu sawrkar rate-in ZOHANDCO in a lei leh dawn a, midang hnena sawrkar rate aia to a hralhna hre tan hralh theih reng a ni a, sawrkar rate aia tlawma hralhte hnenah Support Price pek an ni dawn lo a, hei hi ZOHANDCO in sawrkar rate-a a lei vek theih dawn vang a ni a. Mimal leh sumdawng Hmunphiah leitute chuan Land Resources, Soil & Water Conservation Department hnenah Certificate of origin lak tur a ni a, chumi hmang chuan EF&CC-ah transit pass lak leh tur a ni.

Kumin November ni 24-a New Delhi-a neih zawh tak ‘Stakeholders Consultation for Mizoram Ginger Produce’ chungchang he hunah hian ngaihthlak niin, “Kha Consultation Meeting-ah khan NITI Aayog chuan Mizoram chu ‘Ginger Capital of India’ ah a puang a. Hei hian Mizoram chu Sawhthing quality tha neitu State a nihzia a tichiang hle a ni. Tin, tunhnaiah Mizoram chu India rama Sawhthing thar tam State zingah a inhlang chho mek bawk,” an ti a. Hei vang hian MAMB chuan NITI Aayog chungah lawmthu sawiin, Sawhthing quality tha, chemical laka him ngei tharchhuak tura nasa zawka tanlak zel an rel a. Kumthar lama Organic hmanga Sawhthing ching thei tur khuate chu MAMB hnena in-report turin an ngen a, organic-a kalpui thei khuate chu Collection Center kaltlang kher lova an khuaa leisak dan dap a ni ang a. Kumina Organic taka kalpui mek khuate chuan MAMB hi hriattir nghal tur a ni bawk.