Serchhip-ah YMA Football khel dawn

Serchhip Sub-Hqrs. YMA buatsaih Inter-Branch YMA Football Tournament chu tun thla ni 25 atang khian Serchhip-ah khelh a ni dawn a, tun thla ni 19 thleng Entry Fee pek theih a ni ang.

Serchhip Sub-Hqrs. YMA hnuaia Branch hrang hrang tana Football Tournament hmasa ber tur hi Sub-Hqrs. YMA Sports & Recreation Committee ten hun engemaw chen an buaipui hnuah ruahmanna siam fel a ni ta a, he inelna hi Mipa tana ruahman niin Serchhip Sub-Hqrs. YMA hnuaia YMA Branch 70 vel te inel tura beisei a ni a, tun thla ni 19 thleng Entry fee Rs. 500/- hi Sub-Hqrs. YMA Office leh Ph. No. 9862463316 (gpay)-ah pek theih a ni ang.

He Tournament-a Champion Team hian Rs. 50,000/- bakah Dekchi leh Certificate an dawng thei dawn a, pahnihna in Rs. 25,000/- bakah Dekchi leh Certificate dawngin Semi Final-a chak lo ten Rs. 7000/- ve ve bakah a tel zawng zawngte tan lawmman siam tum a ni bawk a, hei bakah hian Fair Play lawmman Rs. 5000/- siam a ni bawk ang.

Serchhip Sports Complex-a khelh tur he Tournament Tie Draw chu tun thla ni 20 zan khian Serchhip Sub-Hqrs. YMA Conference Hall-ah neih a ni dawn a, YMA inelna a nih angin Branch tin te thianghlim tak leh dik taka Player selection nei tura beisei niin August 2022 hma lama Branch YMA Member ni chin chauh he Tournament-ah hian khelh theih a ni dawn a ni.