Ziak leh chhiar tam lamah Mizoram chu ramchhungah a ber a ni thei - President

President Ram Nath Kovind chuan ziak leh chhiar tam lamah Mizoram chu ramchhungah a ber a ni thei tih a sawi.

Mizoram University Convocation vawi 16-na nimin-a neih a hmanpuina ah he thu hi sawiin President chuan, Mizoram chu a boruak a tha hle tih thu leh khawpui chhungah pawh lirthei khalhtuten a tul lova horn an hmet ngai lo te leh Traffic system mumal taka a awm chu ngaihsanawm a tih thu a sawi a. Mizoram chu a mawi mai a ni lova, a chhunga lehkhathiam an tam em em a, State ang zawngin lehkhathiam ber pahnihna an ni tih President chuan sawiin, Ramchhung sik leh sa a nuam a, a boruak a thianghlim in Biodiversity-ah a hausa em em a ni, a ti a. Mizoram leh hmarchhak bial a Biodiversity hi humhalh chhunzawm zel ngai tih sawiin, Environment tichhe lo zawnga hma la tura intiam zingah India a tel thu leh kum 2030-a lo thlen huna tihhlawhtin tur tam tak kan nei tih a sawi a. State pawhin State Development Goal hnuaiah tihtur an neih ve thu leh he hmalakna huanga NITI Aayog in State hnathawk tha a thlanchhuah zingah Mizoram chu a titha ber pawl, 60 Score nei a ni thei chu a chhuanawm hle tih a sawi a. Sarang vawikhat chiah hman theih hman khapna kawngah pawh a titha ber te zingah Mizoram a tel leh chu chhuanawm a tih thu leh a lawmpui thu a sawi bawk.

Mizoram chu hun reilote chhungin sumdawnna hmunpui, India hmarchhak tihhmasawnna kawnga State pawimawh tak a ni chho dawn tih pawh President chuan sawiin, International ramri thui tak – Myanmar leh Bangladesh te nen an intawmna hi Border Trade tihhlawnna hmun remchang a ni chho mek tih a sawi a, KMMTTP thawh zawh a nih hun phei chuan India hmarchhak in a thawhchhuahte ram danga a thawn-chhuahna kawtchhuah pawimawh tak a ni dawn bawk a ni, a ti.

President Ram Nath Kovind chuan Mahatma Gandhi-a’n a lo duhthusam thin, Value & Vocational Based Education chu NEP 2020 hnuaiah tihpuitlin a lo chu lawmawm a tih thu sawiin, he zirna policy thar hnuaiah Skill Development leh Vocational Education te nasa zawka kalpui a ni dawn tih a sawi a. Mizoram pawhin hei hi hmasawnna kawnga ke a penna atan chhawr hle dawn tih sawiin, a chhan chu Mizoram-ah hian ramhmul - thing leh mau-ah te hausakna nasa tak a awm a. Entrepreneur ten Mau sawngbawlna lam hawia Industry leh Horticulture bakah Floriculture lam an hawi a fuh ber a rin thu a sawi bawk a. University te chu Company te ang bawkin an awmna State chhunga mipui-vantlang tana rawngbawlna kawngah mawhphurhna an neih thu leh University Social Responsibility (USR) an neih hmangin thingtlang khua te chu Model Village atan thlangin hmasawnna kawngah tan an lakpui thin tur thu a sawi bawk.