Puih ngai leh puih tlak khaichhuah kawngah sawrkarin theihtawp chhuah zel a tum - Dy. Chief Minister

SEDP Executive Board Chairman leh Deputy Chief Minister Tawnluia chuan 2022-2023 Financial Year atangin SEDP kaltlangin kuthnathawktute tan theihtawp chhuah tum a nih thu sawiin, puih ngai leh puih tlak khaichhuah kawngah sawrkarin theihtawp chhuah zel a tum thu a sawi.

Chalrang leh New Chalrang khuate chawm tur tuilakna hawnna inkhawm nimin-a Chalrang Community Hall-a neih ah Deputy Chief Minister leh SEDP Executive Board Chairman Tawnluia chuan 2022-2023 Financial Year atangin Sawrkar Flagship Programme SEDP kaltlangin kuthnathawktute tan theihtawp chhuah tum a nih thu sawiin, a thawhkhat nan Rs. 50,000/- a bultan tum niin chhungkaw 60,000 thlanchhuah hmasak tum a nih thu a sawi a. MLA bial tinah chhungkaw 1,500 zel thlan phawt tum a nih thu leh a thlangtu turte chu khua leh District Level thlenga siam a nih tur thu a sawi bawk a. A bial (Tuichang) chhung chu Mizorama thei leh thlai hrang hrangte chin tamna leh thar chhuah tamna a ni chu chhuanawm a tih thu sawiin, thalaite chu zirna bakah intodelh tuma theihtawp chhuaha hnathawh hrehlo turin a fuih a, an mamawh leh tul angte sawrkar in a ngaihtuah sak zel dawn thu a sawi a. Puih ngai leh puih tlak khaichhuah kawngah sawrkarin theihtawp chhuah zel a tum thu a sawi a ni.

Nimin-a hawn tak Chalrang-New Chal-rang Water Supply Scheme hi NABARD (RIDF-XXV) sum cheng nuai 459.60 senga nizung chakna hmanga tui pump-na tur niin July ni 2, 2020 khan bul tan a ni a, April ni 30, 2023-a zawh hman tura tih a nih laiin April 30, 2021 khan zawhfel a ni a. Tui connection 299, Chalrang-ah 164 leh New Chalrang-ah 135 pekchhuah niin, PHED/P&V Eastern Engineers chu Implementing Agency an ni.

He tuilakna atan hian Sakeithingham leh Ramri Lui te lak a nih hnuah pump leh a ni a, ni khat-ah darkar 7 chhung tui pump thei tura duan niin mi pakhat in nikhat ah tui litre 55 zel hmang anga chhutin mi 1567 te kum 30 lo la awm leh tur thleng chawmzo tura duan a ni a. Tui pump nan hian Pumping Station 2 siam niin, a vaiin Solar Power Plant 63.65 KW bun a ni bawk.

Comments

Popular News (Last 30 Days)

LPG man bithliah thar