COVID-19 hri kai hmuhchhuah la tlahniam lo

Mizoram-ah ni khat-a COVID-19 hri kai hmuhchhuah zat a tlahniam thei vak rihlo a, niminpiah khan Mizoram-ah Sample  1014 enfiah niin heng atang hian hri kai mi 91 hmuh an ni a, Sample enfiah atanga za zela 8.97 te chuan hri an kai a ni.

Niminpiah khan Mizoram-ah Rapid Antigen Test hmangin Sample 1003 enfiah niin heng atang hian hri kai mi 90 hmuh an ni a, Saitual leh Aizawl District-ah 24 ve ve, Serchhip District-ah 18, Lunglei District-ah 8, Khawzawl District-ah 7, Hnahthial District-ah 5 leh Mamit District-ah hri kai mi 4 hmuh an ni. District hrang hranga TrueNat Laboratory zingah Lunglei-ah Sample 2 leh Lawngtlai-ah Sample pakhat enfiah niin Lawngtlai-ah hian hri kai mi pakhat hmuh a ni a, ZMC-a RT-PCR Laboratory-ah Sample 5 enfiah niin Fluorescent Immunoassay Test hmangin Serchhip-ah Sample 3 enfiah a ni bawk a, hri kai hmuhchhuah an awm lo thung a ni.

Nimin khan Mizoram-ah hri kai enkawl dam mi 54 an awm belh ve leh bawk a, heti hian nimin tlai thlenga Mizoram-a hri kai hmuh tawh chu 2,26,590 niin an zinga 2,25,336 te chu enkawl dam an ni tawh a, hei hi hri kai hmuh tawh atanga chhutin za zela 99.45 dam tawh ang a ni a. Hri kai enkawllai mi 560 la awmin hri kai zingah mi 694 an boral tawh bawk a ni.