Industrial Estate-a ram pek danah lungawilo

Industrial Estate chhunga ram pek dan chungchang ah Industry neitute chuan an lungawi loh thu an sawi.

Nimin khan Mizoram Industry Owners Association (MIOA) hruaitute chu an President F. Rodingliana In ah thukhawmin, Idustrial Area hrang hranga industry neitute hi an chep tak hle thu an sawi a. Dan lova industry ram-a inbengbel tumte leh Industry din tum lo a, thuneitute kaltlanga ram hauh ringawtte an ngaimawh thu an sawi a. Sawrkar hna thlir mai lova Mizo thalaite'n industry dina eizawnna ngialnghet nei tura hma an lak ve theihna'n Industry Department-in tuna ram la awmchhunte hi tun aia khauh zawka humhalh turin hma la tur ngen nise tiin an rel a. Hun rei tak atanga an lo nawr tawh, hnamdang Company ISPAT hnena sawrkarin kum 99 allotment a pek anga ram leilung fa te hi pek ve an nih theih nan chak zawka nawr nise an ti bawk.

Industrial Area chhunga Industry neitute'n Aizawl Municipal Corporation (AMC) hnena Property Tax chhunluh chungchangah kumtin sawrkarah Allotment Fee an chawitir hnuah AMC-ah Property Tax pek leh chu an tih tur a ni em tih thlenga Dan lam thiam te rawn nise an ti bawk.