Latest News

MUP Serchhip District Annual Assembly Serchhip bialtu MLA hovin neih a ni

Mizoram Upa Pawl (MUP) Serchhip District Hqrs. chuan nimin khan Serchhip Auditorium-ah Annual Assembly neiin he hun hi bialtu MLA Lalduhoma chuan khuallian niin a hmanpui a. Beidawnna in kan Society-ah bu a khuar nghet tawh hle nia sawiin, Pathian-a kan kir leh hun hunah kan ram a siamtha dawn niin a sawi.


MUP Serchhip District Hqrs. Annual Assembly-ah hian Serchhip bialtu MLA Lalduhoma chuan Pathian in thil tha tam tak min tiam laiin a thalo lam hlir Mizoram in kan dawng zel nia sawiin, inenfiah kan ngaih thu leh sim tur kan nei nia a hriat thu a sawi a. Heng kan hun tawn mek atanga tlakchhuak tur hian beiseina a pawimawh thu leh Pathian hnena kir leh chu a hnuk a ni tih sawiin, beidawnna in kan Society-ah bu a khuar nghet hle tawh a, hei hi Setana hmanraw lian ber a ni a, Pathian-a kan kir leh hun hun ah kan ram a siamtha dawn a ni, a ti a. Mizoram chu leilung hausakna nasa tak nei kan ni chungin Vawiin thlengin heng hausakna te hi haichhuah ala ni lo tih pawh sawiin, Pathian Manifesto nena ram kan kaihhruai hunah kan leilung hausakna te hi haichhuah anih a rinawm tih a sawi bawk.

Serchhip bialtu MLA chuan Pathian thu chuan amah tihtute chu damreina a pe ang a tih angin MUP member ni thei a damte chu Pathian awmpuina chang an nih thu pawh sawiin, MUP ten an Office cheithatna tura MLA Fund an dil chu a tih hlawhtlin sak tur thu a sawi bawk.

Nimin-a MUP Annual Assembly hi an President CL. Ramngaia chuan kaihruaiin Area hrang hrang leh District MUP report te ngaihthlak a ni a, rorelna neih a ni bawk.

Serchhip District Headquarters MUP hi kum 1975 khan Unit anga ding tanin hemi hnu kum 1985-ah Serchhip Area tia thlak a ni a, Serchhip Area-ah hian Chhiahtlang, Keitum, Bungtlang leh Thenzawl te an tel a ni. Hemi hnu kum 2004 khan Sub-Headquarters ah puan a ni leh a, MUP General Assembly kum 2019 a neihin Sub-Hqrs. te chu District Hqrs. tih tawh nise a tih angin District Hqrs. Serchhip tih alo ni ta a ni. Serchhip District chhungah hian MUP Area 11 leh Branch 71 an awm mek a, Member mipa 3132 leh hmeichhia 3618, an vaiin mi 6750 an awm mek a ni.

Comments

Popular News (Last 30 Days)