Sawrkar inrelbawlna hmang tlem anga lan tum ah puh

Congress MLA Lalrindika Ralte chuan MNF sawrkar chuan sawrkar hnathawkte hlawh tur nasa taka titlemin, sawrkar chu inrelbawlna senso atana sum hmang tlem tur anga budget-a inlantir tum ah a puh.

Mizoram Pradesh Congress Committee (MPCC) hruaitute chuan nimin khan Aizawl Press Club-ah MLA Lalrindika Ralte ho hian thuthar thehdarhtute an kawm a, he hunah hian Sawrkar hnathawkte hlawh tur chu kumtin tlem tala pung tur a ngaih a nih laia a tlem zawk tlat chu thil mak tak a ni tih Lalrindika chuan a sawi a, Sawrkar hnathawk mimal kumtin hlawh pung leh Central Pay Scale mila thla 6 dana Dearness Allowance pungte vang ringawt pawhin a hma kum ai chuan sawrkar hnathawk hlawh atana senso hi a pung ngei tur nia sawiin, kumin-a hlawh atana dah chu kum hmasa Budget Estimate aiin cheng nuai 17,689 zetin a tlem zawk niin a sawi a. Sawrkar sum hmanna tura ruahman, Budget reng reng chu chhut chhinna a nih avangin ennawn a nih leh thin thu leh a danglamna awm te chu Supplementary Demands-ah siamrem hnuah Assembly House-a pass thin a ni tih a sawi a. Sawrkar hnathawk hlawh tur kher kher chu sawrkar hnathawk awm zat hriat sa vek a nih avangin dik zawka chhut chhin theih a ni tih a sawi bawk.