Latest News

North Vanlaiphai tana tui lak hna thawh mek enfiah

Image
North Vanlaiphai khaw mipui tana tui thiang-hlim in tur lakna tura hnathawh kal lai mek, North Vanlaiphai Water Supply Scheme, Rawleihlawn Pumping chu tunhnai khan North Vanlaiphai Village Council leh North Vanlaiphai Joint YMA hruaitu ten a hmunah kala enfiahin, hna thawh tawh te tha an tih thu an sawi a, hna chak leh tha zawka thawk zel turin an ngen.

Mizoram Assembly proceeding hi India ramah a tha ber leh zahawm ber tiin sawi a ni thin - Speaker

Mizoram State Legislative Assembly Speaker Lalrinliana Sailo chuan Mizoram State Legislative Assembly proceeding chu India ramah a tha ber leh kalphung zahawm ber tia sawi a ni thin tih a sawi.

Mizoram Legislative Assembly kum 50-na (Golden Jubilee) lawmna puala buatsaih ‘Youth Parliament Competition’ Final nimin-a Assembly Conference Hall-a neih a hmanpuina ah he thu hi sawiin Speaker Lalrinliana Sailo chuan Mizoram Legislative Assembly in kum 50 tlinga mellung pawimawh tak a thleng chu Pathian kaihhruaina leh Zoram mipuite thlawpna tha tak vang a ni tih sawiin, Parliament leh Legislative Assembly zahawmna te, a kalphungte hi kan hriattlan a tul thu a sawi a. Democracy kan kalpui danah ram puma rorelna sang ber chu Parliament a nih rualin State-ah chuan Legislative Assembly a ni tih sawiin, “Ramchhung inrelbawlna leh mipuite nghawng dan pawimawh tak tak siamna hmun a nih avangin a hlu a, mipuite pawhin an kalphung hi an hriatchian a ngai a, a bik takin thalaiten a nihna dik tak hi kan hriat theuh a pawimawh,” a ti a, Youth Parliament kaltlang hian mipuite ah zirtirna pek an duh thu leh hei hian thalaiten kan ram rorelna sang an hmuh dante pawh a hriatthiam theih avangin tupawhin kan tangkaipui ngei a beisei thu a sawi a, Youth Parliament hi an buatsaih chhunzawm zel tur thu a sawi bawk.

Mizoram Assembly Speaker chuan boruak chhia leh House a thil mawi lo awm lo tluka an kal thei thin chu a lawmawm tih pawh sawiin, “A bik takin Mizoram State Legislative Assembly proceeding hi India ramah a tha ber leh kalphung zahawm ber tiin min sawi thin a, inthlanpui kan kalpui dan pawh a felfai ber min ti hial thin a ni,” a ti a. Heti chung hian hma kan sawnna tur leh kan insiamthatna tur tam tak a la awm tih sawiin, mipuite pawhin lo chika, a hmasawn zanga an kal zel theihna tura tanlakpui turin a sawm bawk a ni.

Youth Parliament Competition hi College zirlaite puala ruahman a ni a, Mizoram chhunga College 5 - Govt. Aizawl College, Govt. Hrangbana College, Govt. Kolasib College, Pachhunga University College leh Govt. Serchhip College te telin heng te atang hian a tha zual pathum thlan an nih hnuah nimin khan Final hi neih a ni a, Govt. Aizawl College chu pakhatna niin Certificate leh Rs. 1,00,000/- an dawng a, pahnihna Pachhunga University College in Certificate leh Rs. 70,000/- dawngin pathumna Govt. Hrangbana College chuan Certificate leh Rs. 50,000/- an dawng a, Govt. Kolasib College leh Govt. Serchhip College ten Rs. 10,000/- leh Certificate an dawng ve ve bawk a ni. Hei bakah hian Best Parliamentarian atan Beirapatha Khaila, Govt. Hrangbana College thlan niin Rs. 10,000/- leh Certificate a dawng a, Brandon Lalramnghaka, PUC chu pahnihna niin Rs. 7,000/- leh Certificate dawngin pathumna Lalhmangaihsanga, Govt. Aizawl College-in Rs. 5000/- leh Certificate a dawng bawk.

Comments

Popular News (Last 30 Days)