CM in lawmman hlan

Chief Minister Zoramthanga chuan nimin khan Mizo Academy of Letters (MAL) din cham-pha (Foundation Day) lawmna hun Assembly Annex Conference Hall-a buatsaih chu hmanpuiin Book of the Year 2021 atana thlan ‘Hnam Ropuite u, tho r'u le’ ziaktu Lalhruaitluanga Chawngte hnenah lawmman a hlan a, Chief Minister chuan ziakmite chu an thuziah ah a eng lam, a 'positive' zawnga ziak hram tum tura ngenin, Mizoram chungchang ziaktu in a thalo lai leh tha lai ziah tur tam tak a hmuh tur thu sawiin, Hmasawnna rilru put erawh chuan thatna lam ziah tam a, chumi thatna chu umzui zelin, hmasawnna raltiang a kai theih tur thu a sawi a ni. Chief Minister hian MAL website thar- mizoacademyofletters.com/ chu a tlangzarh bawk a ni. Mizo Academy of Letters-in Book of the Year a thlan hmasak ber atanga chhutin lawmman dawngtu mi 27 an awm tawh a, vawi hnih dawng hi mi panga an awm bawk.