'World Book Day' pualin MZP ten Lehkhabu chhiar hlutna inzirtirna hun an buatsaih

Inrinni khan World Book Day pualin MZP General Hqrs. chuan Aizawl-a MZP Conference Hall-ah hun hmangin he hun hi Human Resource Development Board Vice Chairman L. Thangmawia MLA chuan a hmanpui a ni.

He hunah hian Human Resource Development Board Vice Chairman chuan Hnam fing leh mifing apiangin lehkhabu an chhiar nasa in an ngaihlu tih a sawi a, “Chhiar tam na na na chu kan thil tihna hrang hrangah thu lak nan kan hmang tlangpui a. Hemi kawngah hian thangthar ten tan kan lak a ngai a. Lehkhabu kan chhiar tam chuan ram leh hnam tana beihna kawngah a ni emaw, tawng hmasawnna tur leh tawng humhalhna kawngah nasa takin lungrualna min thlen ngei ka ring a ni,” a ti bawk.

Chief Minister Zoramthanga'n HRD Board hnena Mizo Language Development Board (MLDB)  din a nih theih nana hmala tura a tih angin chak taka hmalak a nih thu leh tunah chuan din fel a lo ni ta tih pawh sawiin, he Board in hna a thawh theih hunah chuan Mizo tawng humhim leh tih hmasawn mai piah lamah Zofa hnam hrang hrangte tawng tih hmasawnnan a thawk dawn a, chuvangin Mizo hnam hrang hrang te tawng-a ziak lehkhabu a pun phah hle dawn a ni, a ti a. “Hun kaltaa Mizo History ziak tam tak te Aizawl leh Lusei laimu (centric) behchhana ziak a tam avangin Zofa hnam hrang hrang ten an pawm lo fo thin a, MLD Board lo piang hian Mizo History thlengin hmel thar min hmuh tir ka bei sei a, chutiang a thlen theihna turin thangthar zawk ten Mizo hnam zawng zawng huap zo tura kan History te kan chhui a, kan ziah a tul hle a, chutianga hmala tur chuan Mizo thalai lehkhathiam tak tak te leh Historian te ka ngen che u a ni,” a ti bawk.

He hunah hian MZP President Lalnunmawia Pautu chuan Lehkhabu chhiar pawimawhna leh Ziaktute pawimawhna kan hriat tharna hun pawimawh tak a nih beiseiin he hun hi an buat-saih tih a sawi a. Thalaiten Social Media kan khawih nasat avângin lehkhabu leh lehkhabu ziaktute ngaihhlutna châng kan hre tawh lo tih sawiin, “UPSC hnuaia  All India Service leh Central Service exam-ah Mizo zirlaite kan tlin tam theih nan kan chhehvela lehkhabu kan chhiar tam a pawimawh zual hle,” a ti bawk. He hunah hian MZP Adviser Dr. Vanlalremruata Tonson chuan 'Lehkhabu chhiar hlutna' tih thupui hmangin thu a sawi bawk a ni.