LENKAWL ADS (Revenue) :

Serchhip District-a Heroine No. 4 man tam tum nia hriat ah Zirtawpni zan khan Serchhip Police te chuan Heroin No. 4 Hawng 103, kg 1.278 zet an man. Serchhip Police te hian an thudawn bawhzuiin Zirtawpni zan khan North Vanlaiphai lam atanga Private Car pakhat rawn chhuk chu lo changin he Motor hi lo enfiah a ni a, he Motor ah hian engmah hmuh ni lo mah se a chuang mi thenkhat chu Keitum khua ah an chhuk tih hriat a nih avangin Keitum-a Police duty te chuan khawtlang hruaitute punin heng mite hi man an ni a, thu zawhfiah an nih hnuah Keitum leh Tuichang lui inkar-a heng damdawi an dah te hi zuk hmuh-chhuah a ni ta a ni.

Heroin

No. 4 man tak hi Hawng 103, kg 1.278 nia chhut niin International market-ah chuan cheng vbc. 6.39 man vel nia chhut a ni a, hemi kaihhnawih ah hian mi 5, Lallianzuali (37), North Vanlaiphai Venglai; Lalrindiki (34), Seling; Zosangzuala (29), Tuikhurhlu; C. Cherthanga (27), Tuikhurhlu leh Lalruatdika (29), Serchhip Saron Veng nia insawi te chu manin thubuai siam sak an ni a, an motor hman pawh hi hren nghal niin Inrinni khan Serchhip Court-ah hruai an ni.

Heng damdawi te Myanmar lam atanga lak nia hriat niin Lalrindiki hian North Vanlai-phai-a ba thing tur anga insawi in Tuikhurhlu-a Motor hi a rawn hmang nia thudawn a ni a, hemi hnu hian Cherhlun-ah kal lehin damdawi inhlan a remchan loh avangin Ngharchhip dai ah an inhlan nia hriat a ni a, heng damdawi te hi Sahbon bawm-ah uluk taka dah niin hemi hnu hian tha taka pack leh vek a ni

Serchhip Police te chuan heng ruihhlo man a nih theihna tura Keitum khawtlang VC, VDP leh YMA ten theihtawp an lo chhuahpuina ah lawmthu an sawi a. Hetiang anga tam Heroin No. 4 man hi Mizoram-ah a tam lo tih pawh sawiin, hetiang zat ruihhlo man sak te hi kum 10 atang 20 thleng lung In tan tir leh pawisa cheng nuai 2 thleng chawitir theih an nih thu an sawi bawk.