Sialhawk khaw chawmna tur tuilakna hawng

NABARD (RIDF-XXIV) sum cheng nuai 1261.78 senga Raifan lui atanga nizung chakna hmanga Sialhawk khua chawmna tur tuilakna, Sialhawk Water Supply Scheme chu nimin khan bialtu MLA leh Deputy Chief Minister Tawnluia chuan a hawng.

Tuilak hawnna puala inkhawm Sialhawk Community Hall-a neih ah Deputy Chief Minister chuan tui harsatna khua Sialhawk in hnianghnar zawka tui an dawn theih nana tuilakna thar hawn a ni ta chu lawmawm a tih thu a sawi a. Tui pump chhuah mai bakah In tina tui connection pek vek tum a nih thu a sawi bawk.

Sialhawk Water Supply Scheme (Solar pumping) hi August ni 19, 2019 khan bultan niin, May ni 31, 2022-a zawh hman tura tih chu September ni 1, 2021 khan tui pump chhuah theiha siam a ni a. Tui connection In 520 tan pekchhuah tum niin PHED/Gangwal Engineering & Construction Company Private Ltd. te chu Implementing Agency an ni.

He tuilakna hmang hian mi pakhat in ni khat-ah tui litre 55 zel hmang anga chhutin mi 3,212 te kum 30 lo la awm leh tur thleng chawmzo tura duan a ni a, Tui pump chhuahna lui atanga tui dahkhawlna tuizem lian, Sialhawk khaw lu-a awm insan hleihna hi metre 860 a ni a. Nikhatah darkar 7 chhung tui pump thei tur leh nitin tui litre nuai 2,12,000 pump thei tura duan a ni a. Tui hi gravity hmangin km khat-a thui  lakkhawm hmasak zet hnuah nizung chakna hmanga pump chhuah a ni.

Tuichang bialtu MLA hian nimin vek khan a bial chhunga Vangtlang, Tlangpui leh Tlangmawi khua te a tlawh nghal bawk.