Latest News

Serchhip-ah Mizo infiamna hmanga inelna neih tan a ni

Image
Serchhip Sub-Hqrs. YMA huamchhunga YMA Branch hrang hrangte Mizo Infiamna chi hrang hrang hmanga an inelna tur, ‘Aizawl DD Mizoram Indigenous Games 2024 (Inter-Branch YMA Competition, Serchhip District)’ chu nimin khan Serchhip P&E Veng-a Leisekawt Mual-ah neih tan niin Vawiin hian zawhfel a ni ang.

Kum 1 leh 19 inkar te hnena Rulhut hlo pek beihpuithlakna kalpui tan a ni


Naupang kum 1 atanga 19 thleng te hnena Rulhut hlo pek beihpuithlakna hun, National Deworming Day chu kumin atana a hmasa zawk turin nimin khan rampum ah hman leh niin Serchhip-ah pawh District Bawrhsap Nazuk Kumar IAS chuan beihpuithlakna hi hawngin zirlaite hnenah Rulhut hlo a sem nghal a ni.

National Deworming Day puala Govt. Higher Secondary School Serchhip-a hun hman ah hian District Bawrhsap Nazuk Kumar IAS chuan kumdanga lo hman tawh thin anga National Deworming Day hman a ni leh ta chu lawmawm a tih thu sawiin, he hunah hian naupang kum 1 atanga kum 19 inkar zawng zawngte chu rulhut hlo eitir vek tur a nih thu a sawi a. Rulhut hian kan taksa than chhohna kawngah kan taksa leh rilru thlenga a tha lo zawnga nghawng a neih theih avangin kan District chhunga he damdawi ei tur kum bithliah huam chin te chuan kim taka lo ei vek turin a ngen a ni. Bawrhsap chuan Zirlai naupangte chu tun hi an vanglai, a nuna hun pawimawh tak an hman lai a ni tih hriaa hlim taka chena nasa taka lehkha zir turin a chah a, thianghlimna leh hriselna atana kawng tha te zawh tum tlat zel turin a fuih bawk.

Bawrhsap chuan hun engemaw chen COVID-19 hripui vanga School khar a nih hnuah dan pangngaia kal leh theih a ni ta chu lawmawm a tih thu sawiin, tluang taka kan kal zel theih nana pawimawh em em chu mitin ten tha taka COVID-19 himna dante kan zawm tlan chu a ni tih a sawi a, zirlai naupangte leh mitin ten CAB tha taka kan zawm zel a tul hle tih a sawi bawk.

National Deworming Day puala hun hman hi Serchhip CMO Dr. Lalzawmi chuan kai-hruaiin District Surveillance Officer (DSO) Dr. Lalngaihawmi Chhangte chuan Rulhut in taksa ah harsatna a thlen dan leh a inven dan te, Rulhut hlo ei a pawimawhna te chipchiar takin zirlaite a hrilhfiah bawk a. Serchhip SDEO Vanlalchhana leh he School Principal RK. Sanghmingliana te pawhin thu an sawi bawk a ni.

National Deworming Day hi kum khat ah tum hnih hman thin niin tun tumah hian Ser-chhip District-a kum 1-19 inkar mi sing hnih vel te hnenah Rulhut hlo pek a ni dawn a. Anganwadi Centre leh zirna In ah te Rulhut hlo hi pein heng a kal ve lo te chu ASHA ten an In lamah kal-chilhin Rulhut hlo hi pek ve tur an ni ang.

Comments

Popular News (Last 30 Days)