Hri kai 28 hmuh belh leh

Nimin khan Serchhip District-ah COVID-19 hri kai mi 28 hmuh belh leh niin hri kai mi 36 enkawl dam an ni bawk.

Nimin a Serchhip District-a hri kai thar te hi Thenzawl-ah 11, Hmun-tha-ah 9, Chhiahtlang leh East Lungdar-ah mi 3 ve ve leh Khawlailung-ah mi 2 te an ni. Nimin khan Serchhip District-ah hri kai enkawl dam mi 36 an awm belh ve leh bawk a ni.

Heti hian nimin tlai thleng khan Serchhip District-a COVID-19 hri kai hmuhchhuah tawh chu 13,821 niin an zinga 13,626 te chu enkawl dam an ni tawh a, hri kai hmuhchhuah atanga chhutin za zela 98.58 te chu enkawl dam an ni tawh a, hri kai enkawllai mi 161 la awmin hri kai zingah mi 34 an boral tawh bawk a ni.

Tun dinhmunah Serchhip District chhunga khaw 10-ah COVID-19 hri kai enkawllai an la awm a, hri kai enkawllai mek zinga a zatve aia tam, mi 87 te chu Hmuntha khuaa enkawllai an ni a, Thenzawl-ah mi 31 leh Khawlailung-ah mi 21 enkawl mek ni bawkin Chhiahtlang leh East Lungdar-ah mi 7 ve ve enkawllai an awm a. Serchhip-ah hri kai enkawllai mi 3 awm bawkin Chhingchhip-ah 2 leh Hmunzawl, Keitum leh Sialsir-ah mi pakhat theuh enkawl an la ni bawk.