National Apprenticeship Mela 2022 hman a ni

Apprentice ni duhte leh ruai theite tana intawhkhawmna hun, National Apprenticeship Mela chu ramchhung hmundangte rualin nimin khan Aizawl-ah pawh hman a ni.

Aijal Club-a National Apprenticeship Mela hi Man Power Development Board Vice Chairman Zothantluanga MLA chuan hmanpuiin Apprenticeship Mela hi Mizo thalaiten eizawnna an hmuhna tur leh an thiamthil mila eizawnna tur inkawhhmuhna hun pawimawh tak a ni tih a sawi a. Themthiamna lama eizawnna hi kan uar deuh deuh a tul tawh tih sawiin, thlalai nun beisawng tak takte khaichhuak tur hian he huna kalkhawmte hi an pawimawh a ni tih hre reng tur leh hemi kawnga thahnemngai taka hma la zel turin a chah bawk a ni.

National Apprenticeship Mela hi India ram pumah April 21-ah hman vek a ni a, he Mela in a tum ber chu Apprentice ni duhte leh ruai theite tana intawhkhawmna hun lo buatsaih niin Labour, Employment, Skill Development & Entrepreneurship Deputy Director Lalmuanawma chuan Apprenticeship Mela chungchang leh Apprenticeship Act hnuaia hna petute tana hamthatna awm theite a sawi a. National Skill Training Institute-a Training Officer Darisa Kharwanlang chuan National Apprenticeship Promotion Scheme leh National Apprenticeship Training Scheme kalpui dan turte, State in tihtur a neih leh a mawhphurhna bakah, Mizoram thalaite ten an hman tangkai ve theih dan turte a sawi bawk.