ASF laka Serchhip District a him theihna tura hmalak dan tur sawihona neih a ni

AH&Vety Department-a District Veterinary Officer Dr. R. Lalmakthanga chuan African Swine Fever (ASF) hri leng mek ah Serchhip District-ah hri lenna hmuna puan ala awm lo tih sawiin, ASF Case nei thei dinhmun ah kan din reng thu a sawi.

Serchhip-a AH&Vety Department huaihawtin Serchhip District-a ASF hri leng thawh hnihna thleng palh thei chungchang ah nimin khan Serchhip DVO Dr. R. Lalmakthanga hovin a Pisa-ah Serchhip khawchhunga Village Council aiawh te, Sub-Hqrs. YMA, MJA Serchhip District, Serchhip Piggery Co-operative Society, Vawk Vulh Association leh Serchhip Sa Zuar Association te chuan hmalak dan tur an sawiho a, he hunah hian Serchhip DVO chuan ASF hri leng chu a ziaawm angin lang mah se tunhnaiah District danga rawn darh thar lehin Infected Area puanna hmun te pawh a awmchho leh tan thu a sawi a. Serchhip District-ah chuan tun dinhmunah ASF report awmlo mahse he hri hi lo thleng ve thei reng anih avangin lo inven lawk chu thil tih makmawh a ni, a ti a. Tun dinhmunah Infected Area a la awm lo tih sawiin, ran damlo report erawh a awm thu leh an sample te lak niin ASF Case nei thei reng dinhmunah erawh kan ding tih a sawi a ni.

He sawihona a kalkhawmte chuan ASF hri laka Serchhip District a him theih nan District dang atanga Vawk lakluh khapna thupek chhuah nise an ti a, khawtual Vawk talh turte chu an dam tha ngei a ni tih hriatchian ni thei se, rinhlehawm nia lang te chu khawtlang hruaitute lo thlithlai thin tura ngen an ni a. Vawk vulhtute midang ran In-a kalpawh lo tura thurawn inpek nise an tih bakah, mahni ranvulhna hmun te hri laka an him theih nan uluk taka tihfai thin nise tih te an sawiho a. Vawk thi an lo awmin mahni hmunhma a phumna tur nei chuan uluk taka phum mai nise, mahni hmunhma a phumna neilo te tan VC tin ten an area-ah hmun lo ngaihtuah se an ti bawk.

He huna tarlan a nih danin nikum April 16 khan Serchhip District-ah ASF Case hmasa ber hmuh niin khaw 29 chu Infected Area-ah puan a ni a, kum kalta December thla a Vawk thi hnuhnung ber thlengin ASF avang hian Vawk 3899 thiin Vawk 3040 suat a ni bawk a, ASF vanga Vawk thi te hi felfai taka chhinchhiah vek a ni bawk.